ёхуд Яссавийнинг устози Арслонбоб мақбараси ёнидаги Амир Темур ёдгорлик мажмуаси ҳақида 

Фаол муштарийларимиз Тўлқин Саидмуродов ва Обиддин Фахриддиновларнинг вилоятимизда соҳибқирон Амир Темурга ёдгорлик ўрнатиш таклифини ҚР “Дўстлик” ҳамжамияти ва Амир Темур халқаро жамғармаси раиси Икромжон Ҳошимжоновга йўллаган эдик. Сўнг тегишли амаллар бажарилди. 

Соҳибқирон Амир Темур Туркистонда Хожа Аҳмад Яссавийга, унинг устози Арслонбобга Ўтрор туманида маҳобатли мақбаралар бунёд этган. 1336 йили 9 апрелда Шаҳрисабздаги Хўжа Илғор қишлоғида туғилган, моҳир қўмондон, бунёдкорлиги билан танилган ҳукмдор 1405 йили 19 февралда Хитойга ҳарбий сафари чоғида Ўтрор туманида вафот этган. 

Туркистон шаҳар ЎЭМБ раиси Райимжон Қўчқоров, ёрдамчиси Ойбек Сатторовлар билан Ўтрор туманидаги Арслонбоб зиёратгоҳига йўл олдик. Оқсоқоллар кенгаши фаоллари Тўлқин Саидмуродов, Дадажон Жамолов, Ҳусан Убайдуллаев, Ўринбосар Тойжонов, санъаткорлар уюшмаси раҳбари Нурмуҳаммад Йўлдошевлар билан сафардош бўлдик. 

Зиёратчилар билан гавжум Арслонбоб мақбарасини зиёрат қилдик. Ўтрор шаҳарчасига йўл олдик. Бу ерда – соҳибқирон Амир Темур ёдгорлик мажмуасини кўздан кечирдик. Давлатимизга ташаккур! Мармар лавҳага давлат тилида улкан ҳарфлар билан битилган ёзувларни ўқишга киришдик:

“Ушбу ёдгорлик мажмуаси машҳур қўмондон, Фарғона ангаридан Месопотамияга, Сирдарё соҳилидан Шимолий Ҳиндистонгача ҳудудни қамраган йирик давлат асосини яратган ҳукмдор, шаҳар қурилишини юксак даражага кўтарган моҳир меъмор, фан ва маданият тараққиётини қўллаб-қувватлаган атоқли давлат арбоби Амир Темур хотирасига бағишланган. Амир Темур 1336 йили Самарқанд атрофидаги Барлос авлодидан чиққан Муҳаммад Тарағайнинг оиласида дунёга келган.

Соҳибқирон А. Темур Хожа Аҳмад қабрини мунтазам зиёрат қилган. 1395 йили унга эҳтиром сифатида Хожа Аҳмаднинг кичик сағанаси ўрнида маҳобатли мақбара қурилишини бошлайди. Ривоятларга кўра, тикланаётган иморат деворлари қулайверади. Вақт ўтиши билан, аввало, Хожа Аҳмаднинг Ўтрорда дафн қилинган устози Арслонбобга мақбара тиклаш даркорлиги ҳақида тушларида аён беради. Амир Темур аввал Арслонбобнинг, сўнгра Хожа Аҳмад Яссавийнинг маҳобатли мақбараларини бунёд эттиради.

Хожа Аҳмадга макон бўлган Туркистон шаҳри Қозоқ хонлигининг пойтахтига, туркий оламининг маънавий марказига айланди”, дея тарихий саналар мукаммал баён этилган. 

Ушбу эзгу ишга камарбаста бўлган Икромжон Акром ўғли Ўтрорда бунёд этилган Амир Темур ёдгорлик мажмуаси ҳақида қуйидагиларни баён этди: 

– 2023 йил 2 апрель куни Туркистон телевидениесида камина ва Амир Темур тахаллуси билан Марказий Осиёга танилган Абубакир Хонхўжаев суҳбат асносида вилоят хокими Дархан Амангелдиулига ёдгорлик ўрнатиш масаласида мурожаат этдик. Бу – сайёҳлар ва зиёратчиларнинг сони кўпайишига ижобий таъсир кўрсатади, албатта. Вилоят ҳокимига хат йўлладик. Вилоят маслаҳати депутати Дулат Абишдан ёдгорлик учун бюджетдан маблағ ажратишга ёрдам сўрадик. Шу мавзудаги мактубларни Сенатор Алишер Сотиволдиев орқали ҚР Маданият вазири Аида Балаева ва ҚР Парламент Сенати раиси Маулен Ашимбаевга йўлладик. Натижада ёдгорлик мажмуаси қурилишига бюджетдан маблағ ажратилди. ҚР Маданият вазири Аида Балаева мажмуа қурилишини шахсий назоратига олиб, Туркистонга келди.