Қозоғистон Республикаси Бош вазири Ўлжас Бектенов Хитойнинг Xinjiang Lihua компанияси раҳбари Чжан Цихай билан умумий қиймати 200 миллиард тенгедан зиёд бўлган пахта-тўқимачилик кластерини яратиш масаласини муҳокама қилди.

Туркистон вилоятидаги TURAN махсус иқтисодий минтақаси ҳудудида пахта-тўқимачилик кластерини ташкил этиш бўйича сармоявий лойиҳасининг ижроси кўриб чиқилди.

Лойиҳа пахта етиштиришдан тортиб, ип, газлама, кийим-кечак ва бошқа маҳсулотлар кўринишидаги тайёр тўқимачилик маҳсулотлари ишлаб чиқаришгача бўлган пахта агросаноат мажмуасини шакллантиришга қаратилган. Экин майдонлари учун 50 минг гектар ажратилиб, ўнта завод, шу жумладан, 4та пахтани қайта ишлаш корхонаси, 2та томчилатиб суғориш ускуналари заводи, шунингдек, 4та тўқимачилик заводи қуриш режалаштирилган. Умумий сармоялар ҳажми 200 миллиард тенгедан зиёд. 4 мингдан ортиқ иш ўрни яратиш режалаштирилган, шу жумладан, 3 мингтаси доимий.

Бугунги кунда кластер эҳтиёжларини қондириш мақсадида ПВХ қувурлар ишлаб чиқариш корхонаси ишга туширилди, тўқимачилик корхоналари қурилиши бошланди. Сармоядор томонидан ирригация инфратузилмаси (канал тармоғи, насос станцияси) қурилмоқда.

Бош вазир Ўлжас Бектенов амалга оширилаётган лойиҳанинг аҳамияти ва иқтисодиётни ривожлантиришда кластер ёндашувининг муҳимлигини, Туркистон вилояти Қозоғистоннинг пахта етиштириладиган ягона вилояти эканлигини таъкидлади.

– Давлат раҳбари иқтисодиётни ранг-баранглаштириш ва аниқ шўъбаларга сармоя жалб этиш вазифасини қўйди. Пахта-тўқимачилик кластерининг ташкил этилиши маҳсулотларнинг қўшилган қийматини ошириш, қишлоқ хўжалиги ишлаб чиқаришини қайта ишлашга алоҳида эътибор қаратган ҳолда ривожлантириш ва мамлакатимиз экспорт салоҳиятини оширишга хизмат қилади. Ҳукумат ҳам ўз навбатида, зарур ёрдамни кўрсатади, – деди Ўлжас Бектенов.