Қозоғистон Республикаси Президенти Қасим-Жўмарт Тўқаев мамлакатнинг хавфсизлиги ва ижтимоий барқарорлигини таъминлаш, фуқаролар ҳаёти сифатини оширишга қаратилган бир қатор муҳим қонунларни имзолади. 

Хусусан, Президент «Ҳудудий мудофаа тўғрисида»ги Қонунни имзолаб, мамлакатда фавқулодда ҳолатлар пайтида аҳолини ҳимоя қилиш, сафарбарлик тизимини мустаҳкамлаш чораларини белгилаб берди. Ҳужжатда таъкидланишича, ҳудудий мудофаа тизими 2020 йилдаги Сардоба сув омборидаги ҳалокат, 2022 йил Қўстанайдаги ёнғин ва жорий йилдаги шимоли-ғарбий ҳудудлардаги сув тошқинларида самарали фаолият юритган.

Шунингдек, Давлат раҳбари ҳуқуқни муҳофаза қилиш тизимини такомиллаштириш, ички ишлар идоралари ва ҳарбий хизматчиларнинг ижтимоий ҳимоясини кучайтириш, канопни саноат мақсадларида етиштириш масалаларини ҳуқуқий жиҳатдан тартибга солувчи ўзгартишларни тасдиқлади.

Яна бир муҳим ҳужжат – уй-жой қурилиши, йўл сифати ва ногиронларни ташиш хизматларини яхшилаш юзасидан ўзгартишларни ўз ичига олган қонун қабул қилинди. Бу борада инватакси хизмати кенгайтирилиб, инфратузилма янада қулайлаштирилади.

Президент, шунингдек, молия бозорини ривожлантириш ва истеъмолчилар ҳуқуқларини ҳимоя қилишга доир қонунга ҳам имзо чекди.

Барча қонунлар матни расмий нашрларда эълон қилинади.