Бугунги кунда илм-фан, таълим, иқтисодиёт ва давлат бошқаруви соҳаларида рақамли технологиялар ҳал қилувчи аҳамият касб этаётган бир пайтда, Қозоғистон ўз илмий-техникавий салоҳиятини яна бир поғона юқорига олиб чиқди.

Қозоғистон Республикаси Президенти Қасим-Жўмарт Тўқаев рақамли тараққиёт соҳасидаги навбатдаги улкан қадам – Alemcloud Миллий суперкомпьютер марказини ишга тушириш маросимида шахсан иштирок этди. Ушбу марказдаги янги суперкомпьютер NVIDIA H200 график процессорлари асосида яратилган бўлиб, бугунги кунда Марказий Осиё минтақасидаги энг илғор ҳисобланади. 

Суперкомпьютер тизими Қозоғистон Республикаси Рақамли тараққиёт, инновациялар ва аэрокосмик саноат вазирлиги ҳамда халқаро ҳамкорлар томонидан ўрнатилиб, фойдаланишга топширилди. Унинг FP8 форматидаги ҳисоб-китоб қобилияти юқори самарадорликни таъминлаб, кенг кўламли илмий ва технологиявий вазифаларни ҳал қилиш имконини беради.

Давлат раҳбари ўз сўзида мазкур ташаббуснинг аҳамиятига алоҳида тўхталиб, суперкомпьютерни ишга тушириш мамлакатнинг стратегик соҳаларини рақамлаштириш, сунъий идрок, маълумотлар таҳлили ва инновацион лойиҳаларни ривожлантиришда муҳим қадам эканини таъкидлади. 

Суперкомпьютернинг ҳисоблаш қуввати нейрон тармоқ ечимларини яратадиган лойиҳаларда ва университетлар, илмий марказлар, шунингдек, давлат муассасалари ҳамда хусусий компаниялар томонидан фойдаланилиши мумкин.