Вилоят ҳокими Нуралхан Кўшеров Ўтрор тумани аҳолиси билан учрашиб, ҳудуднинг ижтимоий-иқтисодий тараққиёт кўрсаткичлари ва галдаги устувор вазифаларни белгилади.

Учрашувда фуқаролар ўзларини қизиқтирган масалаларни кўтариб, фикр-мулоҳазаларини билдирди. Минтақа раҳбари мурожаатлар юзасидан масъул соҳа раҳбарларига аниқ топшириқлар берди.

– Ўтрор туманининг ижтимоий-иқтисодий тараққиётида ижобий кўрсаткичлар қайд этилмоқда. 2026 йилнинг 8 ойида ялпи маҳсулот ҳажми 67,5 миллиард тенгени ташкил этиб, ўтган йилга нисбатан 43,6 фоизга ошди. Асосий капиталга йўналтирилган сармоя ҳажми 28,6 миллиард тенгега, савдо айланмаси эса 5,3 миллиард тенгега етди. 

Жорий йилда Темир қишлоғида Темир станцияси янгиланиб, фойдаланишга топширилди. “Бадастир мактаб” миллий лойиҳа доирасида ўтган йили 600 ўринли янги мактаб фойдаланишга топширилди. Аҳоли фаровонлигини ошириш, сармоявий лойиҳаларни амалга ошириш, янги иш ўринларини очиш ҳамда туман ижтимоий-иқтисодий тараққиёт кўрсаткичларини янада яхшилаш юзасидан ишларни кучайтиришни топшираман, – деди Нуралхан Кўшеров.

Очиқ мулоқот шаклида ўтган учрашувда фуқаролар таълим, автомобиль йўллари, оқова тизими, муҳандислик инфратузилмаси, ер муносабатлари ва бошқа ижтимоий масалаларни кўтарди. Учрашувдан сўнг вилоят ҳокими фуқаролар учун шахсий қабул ўтказди.