Президент Қасим-Жўмарт Тўқаев Ақордада Ўқитувчилар кунига бағишланган тантанали тадбирда иштирок этиб, устозларни касб байрами билан табриклади.

Давлат раҳбари таъкидлаганидек, қалбимизга яқин бу қутлуғ айём халқимизни бирлаштиради. Зеро, устоз ҳар бир инсон ҳаётида беқиёс ўрин тутади. Устозга эҳтиром – жамиятнинг маънавий етуклигини белгилайдиган муҳим мезонлардан биридир.

– Абай ҳазратлари инсонда инсонийлик фазилатлари яхши устоз тарбияси билан шаклланишини айтган. Атоқли адиб Муxтар Ауезов эса «Ўқитувчи – буюк унвон», дея, бу шарафли касбга юксак баҳо берган. Устозларимизга чуқур эҳтиром кўрсатиш, миллат келажаги йўлидаги фидокорона меҳнати учун уларга миннатдорчилик билдириш барчамизнинг бурчимиздир. Бугун илғор технологиялар мисли кўрилмаган суръатда ривожланаётган, ахборот оқими тобора кучайиб бораётган даврда ўқитувчининг ўрни ҳар қачонгидан ҳам муҳим, – деди Президент.

Қасим-Жўмарт Тўқаев педагогларни ҳар томонлама қўллаб-қувватлаш давлат учун устувор вазифалардан бири эканини қайд этди.

Мамлакатда «Педагог мақоми тўғрисида»ги қонун қабул қилингани, давлат мукофотлари тизимига «Қозоғистонда хизмат кўрсатган ўқитувчи» фахрий унвони киритилгани бежиз эмас. Қатор ўқитувчилар юксак давлат мукофоти – «Қозоғистон меҳнат қаҳрамони» унвонига сазовор бўлмоқда. 5 октябрь педагогларнинг касб байрами сифатида расман белгиланди.

Президентнинг таъкидлашича, устозларни умуммиллий миқёсда улуғлаш анъанаси изчил давом эттирилади. Байрам кунларида мамлакатнинг барча ҳудудларида педагогларга давлат мукофотлари топширилиб, уларнинг меҳнати муносиб қадрланмоқда.

– Бу давлат учун ниҳоятда муҳим вазифадир, – деди Қасим-Жўмарт Тўқаев.

Давлат раҳбари келажак авлод тақдирига ҳам алоҳида тўхталди. Бугун мамлакатдаги мактабларда 4 миллиондан зиёд мактаб ўқувчиси таҳсил олмоқда. Демак, аҳолининг ҳар бешинчи фуқароси – бола. Улар ривожланган давлатда, хавфсиз муҳитда, замонавий ва фаровон жамиятда камол топиши керак.

Ана шу мақсад йўлида мамлакатда кенг кўламли ислоҳотлар амалга оширилаётгани таъкидланди. Президент мамлакат тараққиётининг янги босқичи учун мустаҳкам пойдевор яратилаётганини қайд этар экан, янги Конституцияда инсон капитали, илм-фан, таълим ва инновацияларни ривожлантириш давлатнинг муҳим вазифаси ҳамда стратегик йўналиши сифатида белгилаб қўйилганига эътибор қаратди.

Қасим-Жўмарт Тўқаев давлат бошқаруви тизимида амалга оширилган ўзгаришларни ҳам тилга олди. Бир палатали Қурултойга илк сайловлар ўтказилди, Ҳукуматнинг янги таркиби шакллантирилди, Президент ўринбосари лавозими жорий этилди. Хавфсизлик кенгаши девони ташкил этилди. Яқинда эса Қозоғистон Халқ Кенгаши ўз фаолиятини бошлади.

.Давлат раҳбари замонавий ва илғор мамлакатнинг қудрати, аввало, табиий бойликлари билан эмас, инсон капитали сифати билан белгиланишини таъкидлади. Мамлакатнинг жаҳондаги ўрни, иқтисодий салоҳияти ҳам жамиятдаги таълим ва илм-фан даражасига бевосита боғлиқ.

Бу борада сўнгги йилларда залворли ишлар амалга оширилди. Кейинги етти йилда мамлакатда 1 миллиондан зиёд ўқувчи ўрнига мўлжалланган 1342та мактаб барпо этилди. Жорий йилда яна 101та мактаб қурилмоқда.

«Келажак мактаблари» миллий лойиҳаси доирасида таълим муассасалари учун янги андаза жорий этилди. Бу асосда замонавий инфратузилмага эга, болаларнинг сифатли таълим олиши ва ҳар томонлама ривожланиши учун зарур шароит яратилган мактаблар барпо этилмоқда. Бугунга қадар 460 минг ўқувчига мўлжалланган 217та ана шундай мактаб қурилди. Уларнинг 84таси, яъни қарийб 40 фоизи қишлоқларда жойлашган.

Президент шаҳар ва қишлоқ болалари учун сифатли таълим олишда тенг шароит яратилиши зарурлигини таъкидлади.

Айни пайтда умумтаълим мактабларида сунъий идрок тизимлари асосида махсус дарсларни жорий этиш ишлари бошланган. Давлат раҳбари бу йўналишга алоҳида эътибор қаратиш зарурлигини таъкидлади. 

– Замон ўзгариб, таълим олдига янги талаблар қўйилаётган бир пайтда устознинг вазифаси ҳам тобора кенгайиб бормоқда. Бугун у нафақат билим беради, балки ёш авлодни мустақил фикрлашга, янгиликка интилишга ва келажакка ишонч билан қадам қўйишга тайёрлайди. Шу маънода, устозга эътибор — миллат келажагига эътибордир, – деди Президент.

Тантанали тадбирда бир гуруҳ педагогларга давлат мукофотлари топширилди. Тақдирланганлар орасида Туркистон вилоятидаги «Бірінші мамыр» умумтаълим мактаби ўқитувчиси Тагаева Гулмира Турдбекқизи «Қозоғистонда хизмат кўрсатган ўқитувчи» фахрий унвонига, Туркистон вилоятидаги Қапланбек олий аграр-техника коллежи ўқитувчиси Аханов Давлетназар Давлетбаевич «Ерен еңбегі үшін» медалига, Шимкент шаҳридаги 122-сонли «Ақ көгершін» болалар боғчаси мудираси Тайтелиева Жумакуль Шегебаевна «Шапағат» медалига сазовор бўлди.

Байрам кечаси устозлар шарафига бағишланган концерт дастурига уланиб кетди.