ҚР ўзбеклари “Дўстлик” ҳамжамияти қошидаги оқсоқоллар кенгаши раиси ҳамда Шимкент шаҳар оқсоқоллар уюшмаси аъзоси Орифжон Холназаров “1 октябрь – Қариялар куни” байрами муносабати билан Шимкент шаҳрида истиқомат қилувчи ЎЭМБ фаоллари ҳамда туман, қишлоқлар, Туркистон, Тараз шаҳарларидан ташриф буюрган меҳмонларга дастурхон ёзди. 

Шимкент шаҳар ЎЭМБ раиси Тоҳирбек Нишонбоев тадбирга ташриф буюрган шаҳар оқсоқоллар кенгаши раиси Кенжехан Тўлебаев бошчилигидаги бошқарма аъзоларини йиғилганларга таништирар экан, саховатпешалиги учун О. Холназаровнинг ҳимматига миннатдорчилик билдирди.

Тадбир иштирокчиларига ёш хонанда Акрамбек Ирисметовнинг “Буюк Абай” ҳамда Шамши Қалдаяқовларнинг асарларини дўмбирадаги ижроси манзур бўлди.

Шундан сўнг, оқсоқоллар кенгаши раиси Ўктам Иброҳимов, туркистонлик Тўлқин Саидмуродов, таразлик Абдураҳмон Зайнуддинов, жамоат арбоби Фахриддин Қоратоев, фахрий устоз Зуппархон Чолдонов, Ҳусанхон Аҳмадхонов, Ҳайитмат Дўсматов ва бошқалар сўз олиб, ажойиб фикр-мулоҳазалари, қозоқ ва ўзбек халқлари орасидаги дўстлик, биродарлик ришталарини мустаҳкам бўлишини тиладилар. 

Тадбирнинг мазмунли ва кўтаринки руҳда ўтишига санъат устаси, моҳир хонанда Ходимат Расулматовнинг ҳам ҳиссаси залворли бўлди.