Қ. Жандарбеков номидаги Сайрам туман Маданият уйида 5 октябрь – Устозлар кунига бағишлаб «Устозга ҳурмат – авлодларга ибрат» мавзуида тадбир ўтди. Тантанага ташриф буюрган меҳмонлар даҳлизда 1-сонли Сайрам болалар мусиқа мактабининг миллий чолғу асбоблари дастаси ижросидаги куй садолари остида кутиб олинди. 

Тадбир Райимбек Сейтметов номидаги Туркистон вилояти мусиқали драма театри артистлари намойиш этган «Миллат устозлари» саҳна кўриниши билан бошланди. Шундан сўнг Ш. Қалдаяқов номидаги вилоят филармониясининг «Ясси» гуруҳи «Турон рақси»ни ижро этиб, барчага кўтаринки кайфият бағишлади. 

Туман ҳокими Мадияр Ўразалиев устоз ва мураббийларни байрам билан самимий муборакбод этиб, таълим соҳаси вакилларининг ёш авлодни билимли, ватанпарвар ва комил инсонлар сифатида тарбиялашнинг муҳимлигини таъкидлади. Тантанали маросимда таълим соҳаси ривожига ҳисса қўшаётган устозлар – 11 нафар педагог вилоят ва туман ҳокимларининг ташаккурномалари, шунингдек, ҚР Маориф вазирлигининг «Меҳнат фахрийси» медали билан тақдирландилар.

Сайрам туман маслаҳати раиси Шамхат Холмуродов, прокурор вазифасини вақтинча бажарувчи Нурдаулет Айдинбаев, «Әділет» партияси туман бўлими раиси Қуаниш Сиздиқовлар ҳам устозларни байрам билан қутлаб, фидокорона меҳнат қилаётган ўқитувчи ва мураббийларни тақдирладилар.

 Шунингдек, туман таълим бўлими раҳбари Бауржан Ахметов барчани Ўқитувчилар куни байрами билан қутлаб, бугунги кунда маориф соҳасида сидқидил меҳнати билан эътироф қозонган 14 нафар устозни ташаккурномалар билан тақдирлади. 

Маросим якунида қозоқ эстрадаси юлдузи Ернар Айдар иштирокида байрам концерт дастури намойиш этилди.