Туркистон вилояти Сайрам туманидаги Оқсукент қишлоғида Иккинчи жаҳон уруши қатнашчиси, фахрий жангчи Аҳмаджон Анартаевнинг 100 ёшлик юбилейи тантанали нишонланди.

Уруш фахрийсини қутлаш маросимида Сайрам тумани ҳокими Мадияр Оразалиев, Туркистон гарнизони бошлиғи, полковник Талғат Мажимбеков, ҳарбий хизматчилар, Қуролли Кучлар фахрийлари, жангчининг қариндошлари ҳамда қишлоқ аҳли иштирок этди.

Эзгу тадбир марказий истироҳат боғида афсонавий саркарда Бауиржан Момишули ҳайкали пойига гулчамбарлар қўйиш маросими билан бошланди.

Қозоғистон Республикаси Мудофаа вазири номидан Аҳмаджон Анартаевга уруш йилларида кўрсатган жасорати ва юрт равнақи йўлидаги кўп йиллик меҳнати учун чуқур ҳурмат ва миннатдорлик билдирилган табрик мактуби топширилди. Тантанада қатнашганлар ҳам юбилей соҳиби ва унинг оила аъзоларига самимий тилакларини билдириб, фахрийга мустаҳкам соғлиқ, узоқ умр, яқинлари бағрида тинчлик-хотиржамлик ва файзу барака тиладилар.

Аҳмаджон Анартаев 1926 йил 10 ноябрда Сайрам туманидаги Қорабулоқ қишлоғида туғилган. 1944 йилда ҳарбий хизматга чақирилиб, 64-ўқчи полкда оддий аскар сифатида хизмат қилган. Польша ва Германия ҳудудларидаги жангларда иштирок этган. Жанг майдонидаги жасорати ва юрт равнақи йўлидаги меҳнати учун II даражали «Ватан уруши» ордени ҳамда бир қатор медаллар билан тақдирланган.

Бугунги кунда Аҳмаджон Анартаев қишлоқдошлари орасида катта ҳурматга эга, аҳил ва катта оиланинг файзли оқсоқоли. Тўрт ўғил ва беш қиздан 35 нафар невара, 101 нафар чевара ҳамда 50 нафар эвара кўрган.

Аҳмаджон Анартаевнинг ҳаёт йўли мамлакат тарихининг ажралмас қисми бўлиб, жасорат, матонат ва Ватанга садоқат намунасидир. Тарихий хотирани асраш, фахрийларга ҳурмат кўрсатиш ва авлодлар давомийлигини таъминлаш ёшларни ватанпарварлик руҳида тарбиялашда муҳим аҳамият касб этади.