Туркистон вилоятида туризм соҳасини ривожлантириш, сайёҳлик инфратузилмасини такомиллаштириш ва ҳудуднинг жозибадорлигини ошириш борасида изчил ишлар олиб борилмоқда. Бу йўналишдаги ишлар вилоят ҳокими Нуралхан Кўшеровнинг доимий назоратида. Амалга оширилаётган чора-тадбирлар натижасида сайёҳлар оқими кўпайиб, соҳага жалб этилаётган инвестициялар ҳажми ҳам ортиб бормоқда.

2026 йилнинг биринчи ярим йиллигида вилоятга қарийб 217 минг нафар сайёҳ ташриф буюрди. Уларнинг 11 338 нафари хорижлик, 205 426 нафари эса мамлакатимиз фуқароларидир. Бу ўтган йилнинг шу даврига нисбатан 43,4 фоиз кўп. Қиёслаш учун, ўтган йилнинг дастлабки олти ойида вилоятга қарийб 151 минг нафар сайёҳ келган эди.

Сайёҳлардан тушган даромад ҳам сезиларли даражада ўсиб, 6 миллиард тенгега етди. Бу ўтган йилнинг мос давридаги 4 миллиард тенгега нисбатан 147 фоизлик ўсишни англатади. Жорий йилнинг дастлабки тўққиз ойида эса туризм соҳасига 83 миллиард тенге инвестиция жалб қилинди.

Сайёҳлик инфратузилмасини ривожлантириш доирасида бир қатор янги объектлар фойдаланишга топширилди. Жумладан, Туркистон шаҳрида «Ҳунармандлар маркази» очилди. Шунингдек, Тўлеби туманида «Paradise Villas», Туркистон шаҳрида эса «Medina Palace» меҳмонхона мажмуалари иш бошлади.

Жорий йилда вилоятда умумий қиймати 13,7 миллиард тенгени ташкил этадиган 25 та сайёҳлик инвестиция лойиҳасини амалга ошириш кўзда тутилган. Уларнинг қаторида Кентау шаҳрига қарашли Хантағи аҳоли пунктида барпо этилган, қиймати 1 миллиард тенгелик «Khantau» дам олиш маскани ҳам бор. Қурилиш ишлари якунланган мазкур объект фойдаланишга топширилди.

Туркистон шаҳрида ҳам йирик сайёҳлик лойиҳалари амалга оширилмоқда. Айни пайтда майдони 12 гектар, инвестиция қиймати 10 миллиард тенгега тенг бўлган йирик аквапарк мажмуасининг қурилиши давом этмоқда. Объектни жорий йилда фойдаланишга топшириш режалаштирилган. Ушбу лойиҳа шаҳарда сайёҳларга кўрсатиладиган хизматлар турини кенгайтириш, меҳмонлар учун дам олиш имкониятларини янада оширишга хизмат қилади.

Шу билан бирга, тарихий-маданий мерос объектларини асраб-авайлаш ва уларнинг сайёҳлик салоҳиятини юксалтириш мақсадида Кўлтўбе шаҳарчасини ободонлаштириш ишлари олиб борилмоқда. «Yassy Hall Apartments» меҳмонхона мажмуаси қурилишини эса йил охирига қадар якунлаб, фойдаланишга топшириш режалаштирилган.

Мазкур лойиҳалар ҳудуднинг сайёҳлик салоҳиятини ошириш, янги дам олиш масканларини барпо этиш, хизмат кўрсатиш сифатини яхшилаш ҳамда иқтисодиётга қўшимча инвестициялар жалб қилишда муҳим аҳамият касб этади. Туркистон вилоятида тарихий-маданий, зиёрат, экологик ва замонавий дам олиш туризмини бирдек ривожлантириш борасидаги ишлар изчил давом эттирилади.