Давлат раҳбари Қ. Тўкаев, Бош вазир А. Смайлов иштирокида ҚР Ҳукуматининг кенгайтирилган йиғилиши ўтди. Унда 2022 йилнинг биринчи ярим йиллигидаги ижтимоий-иқтисодий тараққиёт якунлари борасида гап борди. Таълим соҳасидаги янгиликлар ва ўзгаришлар эътиборимни тортди. 

Мажлисда айтилган 2 минг нафар малакали педагог ва педагогика олийгоҳлари битурувчиларини Атиров, Манғистов, Алмати ва Туркистон вилоятларига жалб этиш ғоясини қўллаб-қувватлайман. Мактабларга ўқитувчилар етишмаслиги – биз учун янгилик эмас. Кўп йиллик тажрибамдан келиб чиққан ҳолда шуни айтаманки, маориф соҳасини фақат раҳбарлик ва ёрдам бериш вазифаларини адо этибгина юксалтириш мумкин эмас. Зеро таълим – тараққиётнинг энг асосий устуни. Ҳақиқий зиёлилик эса  ўқитувчидан тарайди.  Шунинг учун ҳамкасбларимга айтарим,  янги кадрларни болаларимизни маърифатли қилиш йўлида қўллаб-қувватлашимиз керак. Биз катта ёшли устозлар, ёш муаллимларни яхши қарши олиб, билганларимизни эринмай ўргатишимиз керак. Қўлни-қўлга бериб ишлайдиган вақт келди.