Муҳтарам Президентимиз Қ. Тўқаевнинг Ҳукуматнинг кенгайтирилган йиғилишида сўзлаган нутқини диққат билан тингладим. Ўтган йилга сарҳисоб ясаш ҳамда қисқа муддатлар ичида бажарилиши керак бўлган долзарб масалалар муҳокамасига бағишланган мажлисда асосан иқтисодиёт мавзусига урғу берилди. 

Президент республикада иқтисодий кўрсаткичлар ўсаётгани билан ҳал этилмай келаётган муаммолар кўплиги ҳақида куюниб гапирди. Шунингдек, бугунги оламшумул ўзгаришлар даврида Қозоғистон ўзининг қайси ёндашуви, йўналишига эга бўлиши, қандай аниқ стратегия ва чора-тадбирлар қабул қилиши кераклигига тўхталди. Ҳукуматга бюджет сармоясини тежамкорлик билан сарфлаб, “кўрпага қараб оёқ узатиш” даври келганини эслатди. Қозоғистонга хориж сармоясини жалб этиш борасидаги фаолиятни кучайтириш юзасидан топшириқлар берди. Айниқса, идоралараро расмиятчилик туфайли сармояни ўзлаштириш кўп вақт талаб этаётганини таъкидлади. Хорижий сармояларни жалб этиш суръатлари 2023 йилга нисбатан бултур Ақтўбе, Алмати, Атиров, Шарқий Қозоғистон, Жамбил, Павлодар, Шимолий Қозоғистон вилоятлари ва Алмати шаҳрида кузатилганини салбий омил сифатида кўрсатди. Ҳукуматга барча даражадаги сармоядорларни топиш, қўллаб-қувватлаш ва ҳимоя қилиш вазифасини топширди. Хорижий сармоядорларни асосан Қозоғистонда янгидан очилган 17та кон соҳасига жалб этиш зарурлигини алоҳида қайд этди. Кончилик тармоғида ислоҳотлар давом этишини таъкидлади. 

Бундан ташқари сайёҳлик соҳасига ҳам сармоя зарурлигини, сармоядорлар ёрдамида зудлик билан инфратузилмани барпо этиш, янгилаш масаласини шахсан ўзи қўллаб-қувватлашини таъкидлади. 

Менимча, Ҳукумат йиғилишида кўтарилган ҳар қандай масала долзарб. Масалан, давлатдан кам таъминланган оилаларга берилаётган ижтимоий ёрдам соҳасидаги муаммолар бежиз айтилмади. Президент ёш авлодни нафақа-эҳсонлар ҳисобига яшашга эмас, балки меҳнат қилиб, боқимандалик, қарамлик, танбаллик каби иллатлардан йироқ бўлишга ўргатишни эслатди. Қўшни мамлакатлардан келиб, бизда ишлаб, оилаларини боқаётган минглаб меҳнат муҳожирларининг фаолияти ҳурматга сазоворлигини айтиб ўтди. 

Шундай экан, йил бошидан Юртбошимиз томонидан берилган топшириқлар ижросида биз ҳам фаол бўлайлик, фидойи меҳнатимиз билан юртимиз равнақига ҳисса қўшайлик!