Туркистон вилоятида маданият, маънавият соҳаларини ривожлантириш борасидаги тадбирлар давом этмоқда. 2022 йили вилоятдаги 24та музейда 8404та саёҳат, 672та кўргазма, 618та оммавий тадбирлар уюштирилиб, 3615 дона янги экспонат билан бойиб, жами асори-атиқа жамғармаси 165 665тага етди.

Вилоятда 9та музей ва уларнинг филиаллари жорий таъмирланди. “Буюк Дашт эли” марказининг ходимлари томонидан Ўзбекистондаги Темурийлар тарихи музейи, Грузиянинг миллий музейларига тажриба алмашиш мақсадида саёҳат ташкил этилди. Шунингдек, вилоят музейлари Тараз, Қизилўрда, Алмати ва Ақмўла, Ғарбий Қозоғистон вилоятларида сайёр кўргазмалар ўтказди.

Вилоятдаги 395та кутубхонада китобхонлар сони 425 860 нафарни ташкил этиб, 104 081 дона янги китоблар билан бойитилди. “Фараб” вилоят ҳаммабоп-илмий кутубхонаси ташаббуси билан кутубхоначиларнинг малакасини ошириш мақсадида “Эътиборли кутубхоначи” ёзги ўқув курси йўлга қўйилган. Шунингдек, “Маънавий карвон – Туркистонда” тадбири, касбий кутубхоначилар танлови, “Туркистоннинг сара асари – 2022” тадбири, Тулкибош тумани, Жабағли қишлоқ кутубхонасида илк бор вилоят кутубхоначиларининг анжумани ўтди.

Жорий йил кутубхоначилик соҳасини ривожлантириш, китобхонларни қўллаб-қувватлаш мақсадида “Заковатли миллат” лойиҳаси доирасида “Ягона юрт – ягона китоб”, “Китоб саёҳати – 2023” тадбирлари, энг кўп китоб ўқийдиган китобхонлар ўртасида “Дунёни китоб орқали биламан” ҳамда “Мутолаа вақти – китобхон ўлка!” вилоят танловларини ўтказиш режаланмоқда. Шунингдек, музей ва археология соҳаси, ҳунармандчиликни ривожлантириш, қадимий асори-атиқаларни тарғиб қилиш мақсадида “Туркистон – туркий оламнинг юраги” халқаро тарихчилар ва археологлар анжумани, турли мавзуда симпозиум ва фестиваллар ўтказиш кўзда тутилган.