Ўзбекистон телевидениесининг “Маҳалла” канали ижодкорлари яқинда Сайрам диёридаги “Ақ ниет” тантаналар саройига ташриф буюриб, “Хушвақт” кўрсатувининг навбатдаги сонини тасвирга олдилар. 

Тадбир аввалида таниқли сухандон ва бошловчи Толибжон Исроилов кўҳна ва навқирон заминга илк бора ташриф буюргани, қозоқ ва ўзбек халқларининг дўстлиги азалий экани, сайрамликларнинг қадимдан санъат ва адабиётни чуқур қадрлашидан хабардорлигини мамнуният билан таъкидлади.

Бошловчи Т. Исроилов мазкур телекўрсатув ташаббускори таниқли санъаткор Толиббой Ниёзҳожиев эканлигини алоҳида таъкидлаб, унга самимий миннатдорчилик билдирди. Шундан сўнг устоз санъаткор, мумтоз қўшиқлар ижрочиси Тўлқинжон Ҳасанов “Дилхирож”, қорабулоқлик лирик хонанда Неъматжон Йўлдошев шоир Мирпўлат Мирзонинг шеърига басталанган “Она юртим, гўзал Сайрам” қўшиқларини ижро этдилар. 

Муроджон Абдураимов раҳбарлигидаги “Чашма” халқ чолғу дастаси ижросидаги “Таманно” халқ куйи, Сайрам даҳасидаги “Туркистон” мактаби ўқувчиларининг қозоқча ва ўзбекча, шунингдек, вилоят турк этномаданият бирлашмаси рақс дастасининг миллий рақслари дўстлик ва ҳамжиҳатликни тараннум этувчи мазкур кўрсатув мазмунига ҳамоҳанг бўлди. Шунингдек, санъаткорлар Толиббой Ниёзҳожиевнинг “Дилбарим”, Каримжон Абдуллаевнинг “Лола” қўшиқлари кўрсатувга жозиба бахш этди. Ёш хонандалар Фаррух Ҳакимжонов, Расул ва Муҳаммадали Шамслар ижросидаги замонавий қўшиқлар ҳам барчага манзур бўлди.

Сайрам даҳасида фаолият юритаётган 4-сонли болалар мусиқа мактабининг ўқитувчиси Умид Умаров дўмбирада “Саржайлау” қозоқ халқ куйини ижро этиб берди. Кўрсатувда жорий йили 50 йиллиги нишонланадиган “Ғунча” ашула ва рақс халқ дастасининг хушовоз хонандалари Мирабдумажид Мирҳошимов, Фарида Тўйметова, Биродар Ботиров ва Баҳром Бегметовлар “Туркистон” қўшиғини ижро этиб, барчанинг олқишига сазовор бўлдилар.

Тасвирга олиш жараёнида сўз олган шоира Эркиной Султонова “Она шаҳрим – Сайрамим!” шеърини ўқиб берди. Ўзбек эстрада санъатининг ёрқин намояндаси, фалсафий қўшиқлар ижрочиси Рустам Ғоипов эса янги замонавий тароналарни армуғон этди.

Тадбир якунида “Хушвақт” телекўрсатуви ижодкорлари – бошловчи Толибжон Исроилов “Дўстлик” кўкрак нишони, режиссёр Фарҳод Тўлаганов ва маъмур Маъмура Юсуповалар ҚР ўзбек этномаданият бирлашмалари “Дўстлик” ҳамжамияти ва Шимкент шаҳар ўзбек этномаданият бирлашмасининг совғалари билан тақдирландилар.