Қозоғистон халқи Ассамблеясининг 30 йиллигини юксак савияда нишонлаш мақсадида “Дўстлик” ҳамжамияти ва Шимкент шаҳар ўзбек этномаданият бирлашмаси 30та тадбир ўтказишни режалаштирган. “Ватандошлар” жамоат жамғармаси раиси Одилжон Сатторов раҳбарлигидаги шоир-ёзувчи, санъаткор, ўқитувчи-профессорлардан иборат делегациянинг Шимкент шаҳри ва Туркистон вилоятига сафари режадаги тадбирлардан бири бўлди. 

Меҳмонлар дастлаб Шимкент шаҳридаги Алишер Навоий номидаги мактабда бўлиб, Абай Қунанбайнинг маънавий устози бўлган ҳазрат Мир Алишер Навоийнинг бюсти пойига гулчамбар қўйишди. 

О. Сатторов қозоғистонликларни ҚХАнинг 30 йиллиги билан қутлаб, мамлакатимизда халқлар ўртасидаги дўстликни мустаҳкамлаш, бағрикенглик сиёсатига юксак баҳо берди.

Сўнг Ўзекистон делегацияси шаҳар драма театридаги ҳазрат Навоийнинг 584 йиллигига бағишланган тадбирда иштирок этди. Уларни Шокир Умаров раҳбарлик қилаётган 4-болалар мусиқа мактаби ўқувчилари миллий мусиқа садолари остида қарши олди. 

– Жорий йил Қозоғистон учун тарихий саналарга бой. Шулардан бири – Қозоғистон халқи Ассамблеясининг 30 йиллиги. Ассамблея кўмаги билан уюштирилаётган ушбу тадбирнинг мақсади – қардош икки халқ ўртасидаги дўстликни ривожлантиришдан иборат. Қолаверса, шундай маданий ва маърифий тадбирлар орқали яхши қўшничилик алоқаларини мустаҳкамлаш, халқларимизни жипслаштириш. Ўтган йили икки давлат раҳбарлари – Қасим-Жўмарт Тўқаев ва Шавкат Мирзиёевларнинг Мир Алишер Навоий ҳайкалини очиб бериши тарихий воқеа бўлди, – деди “Дўстлик” ҳамжамияти раиси И. Ҳошимжонов.

Ўзбекистон Республикаси элчихонасининг Алматидаги бош консули Равшан Матчонов, “Ватандошлар” жамоат жамғармаси бошқаруви раиси Одилжон Сатторов, Шимкент шаҳар ўзбек этномаданият бирлашмаси раиси Тоҳир Нишонбоевлар ҳам эзгу тилакларини изҳор этишди.

– Қардош Қозоғистон заминида буюк бобокалонимиз, давлат ва жамоат арбоби, ғазал мулкининг султони Алишер Навоийнинг 584 йиллигига бағишланган тадбирда қатнашаётганимиздан бағоят мамнунмиз. Яхши қўшничилик алоқалари турли синовлардан мардонавор ўтиб келмоқда, ҳозир эса муносабатлар янги босқичга чиққан. Бугунги кунда икки мамлакат ўртасида ҳеч қандай муаммоли масала йўқ, – деди О. Сатторов. 

Шундан сўнг, О. Сатторов И. Ҳошимжонов, Т. Нишонбоев, Ш. Норалиева, Н. Дўстметоваларга “Ватандошлар” жамоат жамғармасининг ташаккурнома ва эсдалик совғаларини топширди. 

Кўплаб эзгу тадбирларга бош-қош бўлаётган жамғарма ижодкор муаллима, шоира Робия Қамчибек қизининг “Ҳамроз” китобини нашр этишга ҳомийлик қилди, тадбирда китобнинг тақдимоти ҳам ўтди.

Тадбир давомида театр артистлари “Алишер Навоий ва Бойқаро” спектаклидан парча намойиш этди, шоирлар шеър ўқишиб, хонандалар қўшиқларини армуғон этишди. Айниқса, Алишер Навоий номидаги ўзбек тили ва адабиёти университети катта ўқитувчиси Ўткир Йўлдошевнинг Навоий ғазалларини моҳирона ўқиши, уларни тавсифлаб бериши томошабинларда катта таассурот қолдирди. 

Тадбирда “Ватандошлар” жамғармаси 30та мактабга 70тадан китоб совға қилди. Туркистон вилоят “Жанубий Қозоғистон” газетаси таҳририяти ҳам бу совғадан бебаҳра қолмади. Шунингдек, 4-болалар мусиқа мактабига миллий чолғу асбоблари тақдим этилиши таҳсинга сазовор бўлди.

Тадбир “Наврўз” тантаналар саройидаги тўкин дастурхон атрофида давом этди. Ўзбекистонлик хонандалар ва “Ватандошлар” жамоат жамғармасининг Шимкент шаҳридаги вакили, Ойбек номидаги 14-мактабнинг ўзбек тили ва адабиёти фани ўқитувчиси Юлдуз Жаҳонгированинг ашулалари тадбирга файз киритди. 

 Шунингдек, Ахмет Байтурсинов номидаги мактабда шаҳар мактаблари ўқувчилари орасида Алишер Навоий ижодига бағишланган танлов ғолибларини тақдирлаш маросимида иштирок этган меҳмонлар эсдалик китобларини тақдим қилишди. 

Жумабек Ташенов номли университет кутубхонасида талабаларга адабий китоблар тақдим этилди.