Жорий йилда “Оңтүстік Қазақстан” вилоят ижтимоий-сиёсий газетаси 100 ёшга тўлади. Шу муносабат билан Туркистон шаҳрида қозоқча курашдан турнир уюштирилди. Мусобақанинг очилиш маросимида вилоят ҳокимининг ўринбосари Бейсенбай Тажибаев, “Оңтүстік Қазақстан” газетасининг директор-Бош муҳаррири Абай Балажан, зиёлилар, спорт ихлосмандлари қатнашди.

– Вилоятимизнинг отахон нашри ҳисобланган – “Оңтүстік Қазақстан” вилоят ижтимоий-сиёсий газетасининг жамиятдаги ўрни муҳим аҳамиятга эга. Бу нафақат нашрнинг, балки қозоқ матбуотининг юбилей тўйидир. Ушбу газетада турли даврларда давлат, жамоат арбоблари фаолият юритди. Қозоқ курашидан мусобақа Туркистон шаҳрида ўтаётганида ҳам ҳикмат бор. Газетанинг 100 йиллик тўйи кузда Туркистон шаҳрида тантанали нишонланади, – деди Б. Тажибаев.

Газета бош муҳаррири Абай Балажан ушбу мусобақа қозоқча курашни халқаро даражага кўтариб, ёшларни миллий қадриятларни эъзозлашга даъват этувчи тадбир бўлганлигини таъкидлади. 61 йилдан буён мунтазам уюштирилаётган мусобақанинг аҳамияти ва мақсадига атрофлича тўхталди. 

“Карвон сарой” сайёҳлик мажмуасида ўтган мусобақада 120га яқин полвон омадини синаб кўрди. “Туя полвон” беллашувида 18 нафар полвон куч синашди. Унда туркистонлик Дидар Хамза ғолиб бўлди. Унга “Chevrolet Nexia” автомашинаси топширилди. Мазкур мусобақани томоша қилган спорт фахрийлари, оқсоқоллар, шаҳар меҳмонлари ташкилотчиларга миннатдорчилик билдиришди.