Бош вазир маслаҳатчиси Ерали Тўғжанов вилоятимизга ташрифи доирасида “Қишлоқ омонати”нинг кўмагида амалга оширилаётган ишлар билан танишди ва дастур ижроси бўйича кенгайтирилган мажлис ўтказди. 

Унда вилоят ҳокими Дархан Сатибалди, шаҳар ва туман ҳокимлари, бошқармалар раҳбарлари, лойиҳалар амалга оширилган қишлоқ ҳокимлари иштирок этди. Мажлисни бошқарган вилоят раҳбари лойиҳанинг вилоят учун аҳамияти юксак эканлигини алоҳида таъкидлади. 

– “Қишлоқ омонати” дастури вилоят аҳолисининг даромадини оширишда ижобий натижа берди. Бугунги кунгача дастур ҳисобидан 30 млрд. тенгелик маҳсулот ишлаб чиқарилди, 3413та янги иш ўрни яратилди, 75та ширкат ташкил қилинди, – деди вилоят ҳокими.

ҚР Бош вазирининг маслаҳатчиси Ерали Тўғжанов лойиҳани амалга ошириш давомидаги ижобий тажрибалар ва муҳим масалаларга тўхталди. Мутасадди бошқармалар ва қишлоқ ҳокимларига лойиҳани талабга мувофиқ равишда амалга оширишни топширди. Фақат чорвачилик эмас, балки, бошқа соҳаларга ҳам эътибор қаратиш зарурлигини таъкидлади.

Вилоят қишлоқ хўжалиги бошқармаси раҳбари Нурбек Бадирақовнинг ҳисоботи тингланди. Унинг таъкидлашича, “Қишлоқ омонати” дастури қишлоқ аҳолисининг фаровонлигини ошириб, ижтимоий шароитларининг яхшиланишига хизмат қилмоқда.