Ноқонуний берилган ва фойдаланилмаётган ерлар соддалаштирилган тартибда давлатга қайтарилиши шарт. Давлат раҳбари Қасим-Жўмарт Тўқаев халққа йўллаган Мактубида ушбу масалага тўхталди. Шунингдек, Президент Агросаноат мажмуасига сармоя жалб қилиш – ўта муҳим вазифа эканлигини таъкидлади. 

Мактубда белгиланган вазифаларни амалга ошириш, бажарилиши зарур ишлар жараёни вилоят ҳокими Дархан Сатибалди раислигида ўтган мажлисда атрофлича муҳокама қилинди. Қишлоқ хўжалиги мақсадидаги ерларнинг майдонини кенгайтириш имконияти кўриб чиқилди. Бўш ётган ерларни давлат тасарруфига қайтариб, аҳолини яйловлар билан таъминлаш юзасидан Давлат раҳбари белгилаган вазифалар ижроси юзасидан ҳисоботлар тингланди.

Умуман олганда, вилоятимизда яйловларни халққа қайтариш ишлари юксак суръатда юритилмоқда. 2023 йилда яйлов тақчиллиги 2122,2 минг гектарни ташкил қилган. Шу мақсадда умумий яйлов майдонини кенгайтириб, аҳоли манзилларидаги молларни олис ҳудудлардаги мавсумий яйловларга чиқаришни уюштириш, туманларда бўрдоқичилик ва оилавий сутчилик фермаларини кўпайтириш ишлари олиб борилди. Натижада аҳоли манзиллари 1,3 млн. гектар умумий яйлов билан таъминланди. 

2024 йилда вилоятда яйлов тақчиллиги камайиб, 608 минг гектарни ташкил қилди. Ҳозирги кунда Туркистон вилоятида умумий яйлов майдони (7та тоифа бўйича) 8 млн. 850 минг гектардан ошади. Хўжалик юритувчи корхоналар учун яйловлар етарли. Асосий масала – чорвага зарур умумий яйлов тақчиллигида. 

Вилоят ҳокими Дархан Сатибалди масаланинг ҳал этилиши қатъий назорат остида эканлигини таъкидлади. Чорвачилик ҳисобидан кун кечирадиган қишлоқ аҳолисига тегишли яйлов масаласи юзасидан мутасаддиларга топшириқлар берди.

Умуман, вилоятда чорвачилик кўрсаткичлари ижобий ўсишни кўрсатган бўлишига қарамай, яйлов тақчиллиги мавжуд. Муаммони бартараф этиш учун жорий йилда яйловлар майдонини 304 минг гектарга кўпайтириш зарур.