Таниқли жамоат арбоби, ҚР Парламент Мажлисининг VI-VII чақириқ депутати Фахриддин Қоратоев «Оңтүстік Қазақстан», «Жанубий Қозоғистон» ва «Южный Казахстан» вилоят ижтимоий-сиёсий газеталари таҳририятларига ташриф буюриб, жамоаларни Мустақиллик байрами билан табриклади.

“Оңтүстік Қазақстан” газетаси таҳририятидаги учрашувда газетани 100 йиллик таваллуд айёми ила қутларкан, юртимизда олиб борилаётган давлат сиёсатининг асосий йўналишлари, ўз фаолияти даврида қабул қилинган қонунларга тўхталиб, эл-юртимиз халқчил ислоҳотларга бугун хайрихоҳлик ва қатъий ишонч билан қараб, уларнинг самарасини тезроқ кўришни исташи ва ана шу талабни инобатга олган ҳолда, Янги Қозоғистон тараққиёт стратегиясининг ишлаб чиқилганини таъкидлади.

– Ҳозир дунёда турли кучлар ўртасида низолар ва зиддиятлар кучаймоқда. Президентимиз таъкидлаганидек, минтақамиздаги тинчлик ва хавфсизликка нисбатан янги-янги таҳдидлар пайдо бўлмоқда. Дунёвийлашув ва кескин рақобат замони, шиддат билан ўзгараётган ҳаёт бизнинг олдимизга кечиктириб бўлмайдиган, ўта муҳим ва долзарб вазифаларни қўймоқда. Мана шундай мураккаб вазиятда барчамиз тинч ва осойишта ҳаётимизни асраш, мустақиллигимизни мустаҳкамлаш учун янада жипслашиб, ҳушёр ва огоҳ бўлиб, дадил ва қатъий ҳаракат қилишимиз зарур. Давлатимиз юртимизда тинчлик ва барқарорликни сақлаш, аҳолининг ҳаёт даражаси сифатини ошириш, жаҳон ҳамжамияти билан дўстлик ва ҳамкорликни кенгайтиришга қаратилган стратегик йўлимизни янада изчил давом эттирмоқда. Қозоғистон Мустақиллигига 33 йил тўлмоқда. Халқимиз ўтган давр мобайнида ғоят оғир ва мураккаб синовлар даврида катта тажриба орттирди. Қанчалик оғир бўлмасин, маррани баланд олиб яшаш ва ишлашга ўргандик. Табиийки, маррани катта олган халқнинг қадамлари ҳам, эришадиган натижалари ҳам залворли бўлади, – деди у “Южный Казахстан” газетаси таҳририятида ўтган учрашувда ва Парламентда қабул қилинган “Масс-медиа тўғрисида”ги Қонуннинг асосий устуворликларига тўхталди.

Икки марта ўзи муҳаррирлик қилган “Жанубий Қозоғистон” газетаси таҳририятидаги учрашувда нашр ададини 16 000 нусхага етказган даврларни эслади, жамоанинг шу кундаги фаолияти билан қизиқди. “Оңтүстік Қазақстан” газетаси ҳафтасига уч марта 8 саҳифадан чоп этилаётгани, “Южный Казахстан” – ҳафтасига икки марта 8 саҳифада, бир марта 4 саҳифада, “Жанубий Қозоғистон” газетаси эса моддий қийинчиликлар туфайли ҳафтасига икки марта 4 саҳифада ва бир марта 8 саҳифада чоп этилаётгани ҳақидаги маълумотга эга бўлди. 

Шунингдек, байрам арафасида ўтган тадбирда иштирок этган Қозоғистон ўзбекларининг “Дўстлик” ҳамжамияти раиси Икром Ҳошимжонов ва теннис бўйича 15 карра жаҳон чемпиони Тўймурод Эшимов жамоани Мустақиллик шодиёнаси билан муборакбод этди. И. Ҳошимжонов таҳририят ходимларидан Айша Бейсебаева ва Гулмира Ашурметоваларга ҳамжамиятнинг “Дўстлик” медалини топширди. 

***

Шунингдек, Ф. Қоратоев куннинг иккинчи ярмида Сайрам тумани марказидаги М. Ауезов номли мактаб жамоасини ҳам байрам билан қутлади, мактаб директори М. Нуров билан мулоқотда бўлди. Жамоадаги муаммолар ва таклифлар ҳақида гап юритди.