Вилоят марказида минтақа тадбиркорлари билан учрашув ўтди. Унда вилоят ҳокими Дархан Сатибалди, “Атамекен” ҚР Миллий тадбиркорлар палатаси бошқарма раисининг ўринбосари Тимур Нақипбеков, маслаҳат депутатлари, ҳуқуқ-тартибот идоралари ва молиявий ташкилотлар раҳбарлари иштирок этди. 

“Очиқ суҳбат” доирасида ҳар бир иштирокчи саволлар билан мурожаат қилиб, бизнес-мулоқот ўрнатилди.

Индустриявий ҳамда махсус иқтисодий минтақалар ривожланган вилоятимизда тадбиркорларга қулай шароитлар яратилган. Уларда тоғ-кон-металлургия мажмуасига мўлжалланган оғир ускуналар, текстиль кластери, ПВХ қувурлари, полимер буюмлар, алюминий профилларини ишлаб чиқарадиган заводлар барпо этилмоқда. Туманларда 14та индустриявий минтақа барпо этилган. Шунингдек, кичик ишлаб чиқариш паркида тадбиркорларга тайёр бинолар имтиёзли шартлар билан тавсия қилинади. Паркда 150дан зиёд саноат майдонлари барпо этилади. Вилоят ҳокими ушбу имкониятлардан самарали фойдаланишга чақирди.

– Тадбиркорликни ривожлантириш орқали биз, минтақанинг иқтисодиётини жадал суръатларда ривожлантирамиз. Шунингдек, минтақага хорижлик сармоядорлар кўплаб ташриф буюрмоқда. Бу борада улар билан қўшма лойиҳаларни амалга ошириш имкониятлари мавжуд. Тадбиркорларни доим қўллаб-қувватлашга тайёрмиз, – деди вилоят ҳокими Дархан Сатибалди.

Тадбиркорларга имтиёзлар бериш учун банкларни субсидиялашга жорий йил бюджетдан 16,2 млрд. тенге ажратилди. Минтақа тадбиркорлари ушбу молия институтлари орқали 91,5 млрд. тенге насия олди. Келгусида вилоят иқтисодиётига туртки берадиган қиймати 2,5 трлн. тенгелик 145та сармоявий лойиҳа амалга оширилади. Натижада 20 мингдан зиёд янги иш ўрни очилади.