Юртимизнинг янада обод бўлиши, халқимиз турмуш фаровонлигининг юксалиши, белгиланган эзгу мақсадларнинг рўёбга чиқиши, энг аввало, қишлоқлар тараққиётига узвий боғлиқ. Шу боис, қишлоқ аҳолиси ҳаётини янада юксак поғонага кўтариш, қишлоқ хўжалигини янада ривожлантириш, унинг самарадорлигини ошириш долзарб вазифалардан биридир. Вилоят ҳокимлигида ўтган навбатдаги девон йиғилиши мана шу мавзуга бағишланди. 

Вилоят ҳокими Дархан Сатибалди яйловларни хатлаш, ветеринария ва қишлоқ хўжалигидаги бошқа муаммоларни ҳал этиш юзасидан мутасадди раҳбарларга аниқ топшириқлар берди.

Йиғилишда вилоят ер муносабатлари ва ветеринария бошқармалари, ер захиралари бошқармаси, шунингдек, Республика Қишлоқ хўжалиги вазирлиги Ветеринария назорати ва тафтиш қўмитасининг Туркистон вилояти бўйича ҳудудий нозирлиги раҳбарларининг ҳисобот ва фикр-мулоҳазалари тингланди. 

 Камчиликлари аниқланган шаҳар ва туманлар ҳокимларига ишларни фаоллаштириш юзасидан кўрсатмалар берилди.

Вилоят ҳокимининг топшириғига мувофиқ махсус ишчи гуруҳ ташкил этилиб, у қишлоқ хўжалиги мажмуаси, ердан фойдаланиш, ветеринария, тадбиркорлик субъектларига субсидиялар бериш ва солиқларни тўлаш масалаларини таҳлил қилди. 

Тадқиқотлар Ўрдабоши, Ўтрор, Сайрам, Чордара ва Келес туманлари ҳамда Арис шаҳрида юритилди. Натижада, солиқ тўлашдан бўйин товлаш, чорва молларини ҳисобга олишда берилган нотўғри маълумотлар, ердан самарасиз фойдаланиш ҳолатлари аниқланган. 

Йиғилишда мутасадди ташкилотларга фойдаланилмаётган ёки Қозоғистон Республикаси қонунчилигини бузган ҳолда фойдаланилаётган қишлоқ хўжалиги ерларини қайтариш борасидаги тадбирларни кучайтириш юзасидан топшириқлар берилди. Шунингдек, қишлоқ хўжалиги соҳасига оид статистик маълумотларни мувофиқлаштириш, ветеринария шифокорларининг малакасини ошириш ҳамда уларнинг масъулиятини кучайтириш, чорва молларини ҳисобга олишда йўл қўйилаётган хатоларга барҳам бериш зарурлиги таъкидланди.

– Ҳукумат қишлоқ хўжалигини бошқаришни рақамлаштириш масаласини кўтарди. Бу борада кенг қамровли ишлар олиб борилиши зарур. Қишлоқ хўжалигини рақамлаштириш соҳасини молиялаштириш лойиҳалари ва манбалари юзасидан таклифлар ишлаб чиқилиши керак, – деди мажлисга якун ясаган минтақа раҳбари.