Вилоят ҳокимининг биринчи ўринбосари Зулпихар Жўлдасов Жетисай туманига хизмат сафарида Интимақ қишлоғидаги қурилиши якунланган “Кирово” АГТС (автоматлаштирилган газ тақсимлаш станцияси) иншооти билан танишди.

Таубай ата, Қурбан ата, Интимақ аҳоли манзилларини ичимли сув билан таъминлаш тармоғининг янгилаш ишлари, “Қишлоқ – эл бешиги” дастури доирасида Қурбан ата аҳоли манзилида ўртача таъмирдан ўтказилаётган вилоят аҳамиятига молик КХ-9 автойўлининг таъмирлаш ишлари билан танишди.

Зулпихар Сансизбайули раислигида ўтган мажлисда туман уй-жой-коммунал хўжалиги соҳасига доир масалалар бўйича мутасадди бошқармаларнинг ҳисоботлари тингланиб, муҳим масалаларни ҳал қилиш йўллари муҳокома қилинди.

5201 одам уй навбатида турган туманнинг 105та аҳоли манзили марказлаштирилган ичимли сув қувурлари билан тўлиқ таъминлансада, 15та аҳоли манзилига ичимли сув жадвал асосида берилмоқда. Мазкур муаммони ҳал қилиш мақсадида қурилиш-монтаж ишлари олиб борилаётган 3та иншоотнинг иккитаси якунланиб, биттаси 2025 йилга ўтади.

Аҳоли манзилларидаги янги кўчаларни сифатли электр қуввати билан таъминлаш мақсадида 2та иншоотнинг қурилишига 1,1 млрд. тенге маблағ ажратилиб, 1та иншоот фойдаланишга топширилди.

Шунингдек, жорий йили йўловчилар транспорти ҳамда автомобиль йўллари соҳасини ривожлантиришга 1,8 млрд. тенге йўналтирилиб, “Қишлоқ – эл бешиги” лойиҳаси доирасида умумий узунлиги 42,1 чақиримни ташкил этадиган 50та кўча ўртача таъмирдан ўтказилмоқда.

Туманда ҳал қилинадиган тегишли масалаларга доир аниқ таклиф ва фикрларни тинглаган вилоят ҳокимининг муовини амалга оширилаётган тадбирларга ижобий баҳо берди.