Давлат хизмати ишлари агентлигининг ташаббуси билан Туркистон шаҳрида Одоб-ахлоқ вакилларининг республика анжумани ўтди.

Унда Давлат хизмати ишлари агентлигининг раиси Дархан Жазиқбай, вилоят ҳокими Дархан Сатибалди, Парламент Сенатининг депутати, Ижтимоий-маданий тараққиёт ва фан қўмитаси раиси Нуртўре Жусип, агентлик қошидаги Жамоат кенгаши раиси Бибигул Ағибаева ва бошқалар иштирок этди.

Тадбирдан кўзланган мақсад – давлат хизматчиларининг хизмат ахлоқи андазалари ҳамда Одоб-аҳлоқ вакиллари хизматини такомиллаштириш масалаларини муҳокама қилиш эди.

Тадбирнинг очилиш маросимида сўзга чиққан агентлик раиси Дархан Жазиқбай жорий йилги анжуманнинг Туркистонда ўтказилиши ўзига хос рамзий моҳиятга эга эканлигини таъкидлади. Давлат раҳбари ушбу шаҳарда ўтган Миллий қурултойда “Адолатли Қозоғистонни адолатпарвар фуқаролар барпо этади”, деган эди. Давлат хизматчилари шахсини адолатпарвар фуқаро ғояларига мос равишда тарғиб қилиш Агентликнинг доимий эътиборидаги масала. Раис тадбир доирасида кўтарилган масалаларга эътибор қаратишнинг муҳимлигини таъкидлади.

Агентлик давлат хизмати соҳасида аниқланган камчиликларни ўрганиб, уларнинг сабабларини таҳлил қилиш ва бартараф этиш борасида кенг қамровли ишларни амалга оширмоқда. Ўтган йил мобайнида Одоб-ахлоқ бўйича вакиллар давлат хизматчилари ўртасида адолат тамойилларини тарғиб этишга қаратилган 30 мингга яқин маърифий тадбирлар ташкил этишди. Таъкидлаш жоизки, бугунги кунда республика бўйича давлат органларида 713 нафар Одоб-ахлоқ вакиллари фаолият юритмоқда.