Жамоатчилик қабулхоналарининг фаолияти партиявий ишнинг энг муҳим йўналишларидан бири. Сайловчилар билан бевосита ишлашга устуворлик бераётган «AMANAT» партияси халқнинг овозига қулоқ солиб, жамият билдирган талабларни ўз вақтида бажарадиган  сиёсий кучга айланди. «AMANAT» – жамиятда ижтимоий адолат тамойилларини ўрнатадиган, барча фуқароларга тенг имкониятлар яратилишини қўллаб-қувватлайдиган, жамият ва давлат фаровонлиги йўлида фаолият юритадиган фирқа сифатида шаклланиб, янги сиёсий маданиятни қарор топтирмоқда.

Яқинда партиянинг вилоят филиали раиси Алтинсари Умбеталиев раҳбарлигида девон йиғилиши ўтиб, унда «Энг яхши жамоатчилик қабулхонаси» республика танловининг вилоят босқичи ғолиблари тақдирланди. Жумладан, Сайрам туман партия бўлими «Энг яхши жамоатчилик қабулхонаси» деб топилиб, иккинчи ўринга Қазиғурт, учинчи ўринга Ўрдабоши туман фирқа бўлимлари муносиб кўрилди. Шунингдек, саралаш босқичида фаоллик кўрсатган «AMANAT» партиясининг Сариоғоч, Тулкибош, Саврон, Тўлебий туманлари ҳамда Арис, Туркистон шаҳар филиалларига ташаккурнома ва совғалар топширилди. 

– Вилоят партия филиалига қарашли жамоатчилик қабулхоналари орқали 2024 йилда 18 мингга яқин фуқаро мурожаатлари кўриб чиқилди. Рўйхатга олинган ариза ва мурожаатларнинг 64 фоизи  ижобий ҳал этилди. Яъни, 11,5 мингдан ортиқ фуқаронинг талаб ва истаклари қондирилишига ҳиссамизни қўшдик. Шунингдек, ўтган йили 6,5 мингдан зиёд фуқаронинг мурожаатлари бўйича малакали ҳуқуқий маслаҳатлар берилди. Чекка ҳудудларда ташкил этилган тезкор сайёр жамоат қабуллари орқали аҳоли масалаларини вилоят марказига бормасдан, жойида ҳал этиш имкониятига эга бўлмоқда, – деди А. Умбеталиев.

Танлов натижалари фуқаролар мурожаатлари билан ишлаш сифати, ижобий ҳал қилинган масалалар улуши, «DOCUMENTOLOG» ахборот тизимига маълумотларни киритиш, жамоатчилик қабулхоналари фаолияти, «Ҳуқуқий ёрдам» лойиҳаси доирасидаги хизмат кўрсатиш ва бошқа мезонлар бўйича аниқланди.

Вилоят босқичида ғолиб бўлиб, республика танловига йўлланма олган «AMANAT» партиясининг Сайрам тумани филиали жамоасини табриклаймиз!