Сайрам туманининг Қўшбулоқ қишлоғида (Кўлкент қишлоқ округи) жойлашган Қ. Сатбаев номли мактаб ўқувчилари Шаҳзода Аҳмадалиева ва Ноила Холниёзова (мураббийи Шоҳрух Абдазимов) стол теннисидан Қозоғистон Республикаси чемпионатида ёшлар ўртасида жуфтлик йўналишида ғолиб чиқиб, Қозоғистон Республикаси спорт устаси унвонига сазовор бўлишди.

Бу ютуқ, албатта, тасодиф эмас, балки кўп йиллик самарали меҳнатнинг меваларидир. Мураббийнинг машғулотлардаги талабчанлиги, спортчиларга ишончи ва меҳри бугун ана шундай улкан натижаларда ўз аксини топмоқда. Албатта, бундай муваффақиятларда ота-оналарнинг ҳиссаси ҳам беқиёс. 

Шаҳзоданинг отаси – Озод Аҳмадалиев, Ноиланинг отаси – Ихтиёр Бобоевларни ҳам бу шарафли ютуқ билан самимий муборакбод этамиз. Чунки соғлом ва тарбияли фарзанд интизом ва оила муҳити самарасидир.

Сатбаев номли мактаб тарихида илк бор мана шундай юксак спорт унвонига сазовор бўлган ўқувчилар етишиб чиқди. Мактаб директори Абдираҳим Отахоновнинг таълим ва тарбияга бўлган жиддий ёндашуви ҳам бу ютуқда муҳим ўрин тутади.

Бугунги кунда мактаб спортчилари нафақат туман, балки республика миқёсида ҳам назарга тушмоқда. Уларнинг ютуқлари ёш авлод учун намуна сифатида хизмат қилади.