Сайрам туманининг Орис қишлоғидаги Худойберган Ҳайтeнов номли хусусий мактаб битирувчиси Азизбек Умаров(тасвирда) улкан ютуққа эришди. Қорабулоқ қишлоғида туғилиб, вояга етган Азизбек бошланғич синфданоқ инглиз тилини мустақил ўрганиб, билимга бўлган иштиёқини эрта намоён этди.

У АҚШ ва Қозоғистондаги бешта нуфузли университетларга, жумладан, Syracuse University, Iowa State University, University at Buffalo, University of Mississippi (Ole Miss) ва Назарбаев Университети каби олий таълим муассасаларидан таклиф олди. 

Азизбек мактабда ўқиган даврида танловларга фаол қатнашиб, республика, вилоят ва минтақавий фан олимпиадаларида бир неча бор совриндор бўлган. 1-9-синфларни Қорабулоқ қишлоғидаги 81-сонли Улуғбек номли мактабда ўқиди, сўнг 10-синфдан эътиборан  ўқишни Х. Ҳайтeнов номли хусусий мактабда давом эттирди.

Ёш истеъдоднинг эътироф этишича, бу мактаб унга янги имкониятлар эшигини очди. Азизбек учун таълим йўлидаги яна бир муҳим босқич – “Zaytuna Academy” таълим маркази бўлди. Ушбу марказда у билимларини мустаҳкамлаб, келажакка муҳим қадам ташлади. Бу ўринда унга мустаҳкам билим берган устози Азимжон Манзуровнинг меҳнатини алоҳида қайд этиш жоиз.

Таъкидлаш жоизки, унинг ота-онаси ҳам туманда таниқли шахслар. Падари бузруквори Абдусаттор Умаров – журналист, у Сайрам туманидаги “Сайрам садоси”, “Мәртөбе”, “Пульс Сайрама” газеталарини бирлаштирган “Исфижоб” МЧБ директори, волидаи муҳтарамаси Ҳуснобод – муаллима. Азизбек келажакда тиббиёт соҳасига ҳисса қўшишни мақсад қилмоқда.