Халқнинг куч-қудрати нафақат қурилган биноларда, балки уларда яшаётган инсонларнинг кўнглидаги шукроналик ва юрагидаги бахт ҳиссида намоён бўлади. Куни кеча туркистонликлар ана шундай эзгу ва қувончли лаҳзалар гувоҳи бўлишди. 

Туркистон вилоятида аҳолини уй-жой билан таъминлаш, ижтимоий адолатни қарор топтириш, инсон қадрини юксалтиришга қаратилган лойиҳалар самара бермоқда.

Вилоят ҳокими Нуралхан Кўшеров барча янги хонадон соҳибларини самимий табриклаб, уларнинг қувончини баҳам кўрди. У ўз нутқида шундай деди:

– Сизларни миллий дўмбира байрами ва Пойтахт куни билан муборакбод этаман! Мана шундай шоду хуррам кунларда янги уй соҳиби бўлиш – бу мустақилликнинг ҳосиласидир. Туркистон ҳозир наинки вилоят маркази, балки бутун туркий оламнинг маънавий марказига айланди. 

Бу шаҳардаги ҳар бир ўзгариш – тарихнинг янги саҳифасидир. Инсон учун энг зарур жиҳат – бу ўз уйига, ўз оиласига эга бўлиш. Биз бундан буён ҳам халқимиз учун таълим, иш ўринлари ва уй-жой яратишни устувор вазифа сифатида давом эттирамиз.

Янги хонадон калитлари билан бирга ҳар бир оилага дўмбира ҳам совға қилинди – бу нафақат маданий тимсол, балки уйга келган файз ва миллий қадриятни улуғловчи рамзга айлансин.

 Қувонарлиси, бу сафар 84 оила, жумладан, 48 нафар кўп болали ва 36 нафар ижтимоий ҳимояга муҳтож оила давлат дастуридан манфаатдор бўлди. Улар йиллар давомида уй-жой навбатида турган оилалардир.

Бугунги кунда Туркистон шаҳрида 16 мингдан зиёд фуқаро уй-жой навбатида турибди. 2023 йилда 961 оила, жорий йилнинг ўзида эса 944 хонадонни навбати келганларга топшириш режалаштирилган. Бу – нафақат статистика, балки минглаб инсон тақдирига бефарқ қарамаётган давлат ғамхўрлигидир.

Янги уй – бу шунчаки бино эмас. Бу ерда фарзандлар улғаяди, янги орзулар туғилади, миллий тарбия ва меҳр муҳити шаклланади.

Туркистондаги ҳар бир янги уй – бу мустақиллик меваси, бу инсон қадрига берилган энг ёрқин баҳодир.