Сербиянинг Нови-Сад шаҳрида ўтган 23 ёшгача бўлган спортчилар ўртасидаги жаҳон чемпионатида Қозоғистон шарафини ҳимоя қилган Шуғилa Ўмирбек хотин-қизлар кураши бўйича жаҳон чемпиони бўлди. 55 килограмм вазн тоифасида беллашган туркистонлик полвон қиз финалда турк спортчиси Туба Демирни 12:8 ҳисоби билан мағлуб этди.

Туркистон вилояти ҳокими Нуралхан Кўшеров жаҳон чемпионини махсус қабул қилиб, унга эҳтиром кўрсатди.

– Сизни бу тарихий ғалаба билан табриклайман! Бу бутун халқимизнинг ва Туркистон ўлкасининг ғалабасидир. Бу натижа – тинимсиз меҳнат ва узлуксиз машғулотлар самарасидир. Шу билан бирга, бу ютуқ – минтақада спорт инфратузилмасини ривожлантириш, ёш иқтидорларни қўллаб-қувватлаш йўлидаги тизимли ишлар натижасидир. Энди ғалаба йўли Олимпиада поғонасида давом этишига ишончим комил, – деди Нуралхан Кўшеров.

Ҳоким Шуғилa Ўмирбекка ташаккурнома ва автомашина калитини тантанали равишда топширди.

Чемпионнинг мураббийи Нуржигит Еримбетов ҳам ташаккурнома ва пул мукофоти билан тақдирланди.

Абдисалан Нурмаханов номидаги спорт мактаби директори Даурен Тангирбергеновга ҳам эҳтиром кўрсатилди.

Шуғилa ва унинг мураббийи вилоят раҳбариятига кўрсатилган эътибор учун миннатдорчилик билдирдилар. 

Таъкидлаш жоизки, Туркистон вилоятида сўнгги йилларда курашнинг барча турлари, жумладан, хотин-қизлар кураши ҳам жадал ривожланмоқда. Минтақа спортчилари Осиё чемпионатларида 17та, жаҳон чемпионатларида 5та медалга сазовор бўлган.