Туркистон шаҳридаги «Дўстлик уйи»да Хожа Аҳмад Яссавийнинг маънавий-фалсафий меросини кенг тарғиб қилишга бағишланган «Яссавий карвони» илмий-маърифий анжумани ўтди.

Лойиҳа Қозоғистон Республикаси Маданият ва ахборот вазирлиги кўмагида, Давлат раҳбарининг миллий қадриятларни тиклаш ва тарихий шахслар меросини кенг тарғиб этиш борасидаги топшириқларини амалга ошириш мақсадида ташкил этилди.

Тадбирда вилоят ҳокими ўринбосари Ертай Алтаев, вилоят маслаҳати раиси Нурали Абишов, давлат идоралари вакиллари, олимлар, диншунослар, зиёлилар, ёшлар ҳамда оммавий ахборот воситалари вакиллари иштирок этди.

Семинарни «Ҳазрат Султон» Миллий тарихий-маданий музей-қўриқхонаси директори Ерлан Дакенов олиб борди. У Хожа Аҳмад Яссавий мероси миллий ўзликни мустаҳкамлаш, ёш авлодни эзгулик, юксак ахлоқ ва ватанпарварлик руҳида тарбиялашда муҳим аҳамият касб этишини таъкидлади.

Йиғилишда вилоят маслаҳати раиси Нурали Абишов сўзга чиқиб, Давлат раҳбари белгилаб берган вазифалар доирасида Яссавий меросини илмий жиҳатдан ўрганиш ва кенг тарғиб қилишнинг аҳамиятига тўхталди. Шунингдек, у вилоят раҳбарининг табриги ва эзгу тилакларини иштирокчиларга етказди.

Семинар давомида Аҳмад Яссавий номидаги Халқаро қозоқ-турк университети профессори, теология фанлари доктори Дўсай Кенжетай «Хожа Аҳмад Ясавий меросининг тарихий ва маънавий аҳамияти» мавзусида маъруза қилди. У буюк мутафаккирнинг туркий оламдаги ўрни ҳамда таълимотининг бугунги жамият учун долзарб аҳамияти ҳақида сўз юритди.

Тадбир давомида иштирокчилар Хожа Аҳмад Яссавий меросини илмий жиҳатдан ўрганиш, уни ёшлар орасида кенг тарғиб қилиш ҳамда маънавий қадриятларни жамият ҳаётига кенг татбиқ этиш масалалари юзасидан фикр алмашдилар.

Туркистон вилояти Дин ишлари бошқармаси маълумотига кўра, «Яссавий карвони» лойиҳаси келгусида вилоятнинг барча шаҳар ва туманларида давом эттирилади. Унинг доирасида аҳоли учун илмий-маърифий учрашувлар, анжуманлар ва маънавий-маърифий тадбирлар ташкил этилади.