Туман полиция бўлимининг жорий йил биринчи ярми якунларига бағишланган ҳисобот йиғилишида жамоат хавфсизлиги, жиноятчиликка қарши кураш соҳасида эришилган натижалар билан бир қаторда, ҳал этилиши зарур бўлган муаммолар ҳам атрофлича таҳлил қилинди.

Туман ҳокими Асқар Естибаев раислигида ўтган йиғилишда полиция бўлими ходимлари, қасаба ва қишлоқ ҳокимлари, ҳуқуқни муҳофаза қилувчи органлар вакиллари ҳамда туман фаоллари иштирок этди. Унда туман полиция бўлими бошлиғи Мурат Абилхан­ули жорий йилнинг дастлабки олти ойида амалга оширилган ҳуқуқ муҳофазаси ва тезкор қидирув тадбирлари натижалари ҳақида маълумот берди.

Айтилган рақамлар ҳуқуқ-тартиботни таъминлаш борасида муайян ижобий силжишлар кузатилганини кўрсатади. Хусусан туманда умумий ҳуқуқбузарликлар ўтган йилнинг шу даврига нисбатан 17,7 фоизга, жиноий ҳуқуқбузарликлар 13,5 фоизга, фирибгарлик жиноятлари 54,5 фоизга, ўта оғир жиноятлар 50 фоизга, хотин-қизларга нисбатан содир этилган ҳуқуқбузарликлар эса 31,7 фоизга камайган.

Ушбу натижалар иллатнинг олдини олиш самараси, ҳуқуқни муҳофаза қилувчи идораларнинг тизимли фаолияти ҳамда жамоатчилик билан ҳамкорлик мустаҳкамланаётганидан далолат беради. Шу билан бирга, полиция ходимлари жамоат хавфсизлигини таъминлаш, аҳоли осойишталигини сақлаш ва ёшлар ўртасида ҳуқуқбузарликларнинг олдини олиш борасида кечаю кундуз фаолият юритаётганини таъкидладилар.

Бироқ таҳлиллар барча йўналишларда вазият барқарор эканлигини англатмайди. Йиғилишда ноқонуний равишда транспорт воситаларини бошқариш, ҳайдовчилик гувономаси бўлмаган шахсларнинг рулда ўтириши, турфа безориликларнинг олдини олиш чора-тадбирларини янада кучайтириш зарурлиги қайд этилди.

Ҳисобот тугагач, аҳоли саволлар билан мурожаат қилиб, вояга етмаганлар орасида ҳуқуқбузарликларнинг олдини олиш, жамоат хавфсизлиги ва бошқа долзарб масалаларга жавоб олишди. Бу эса полиция фаолиятининг очиқлиги ва жамоатчилик билан мулоқот муҳим аҳамият касб этаётганидан далолат.

Йиғилиш сўнггида тартиббузарликларнинг олдини олиш тадбирларини янги босқичга кўтариш, таълим муассасалари, ота-оналар прокуратура ва бошқа ваколатли давлат идоралари билан ҳамкорликни янада фаоллаштириш юзасидан аниқ топшириқлар берилди.