Вилоят ҳокими Нуралхан Кўшеров Ҳиндистон Республикасининг ҚРдаги Фавқулодда ва Мухтор Элчиси Сайлас Тангал билан учрашди. Мулоқот давомида сармояларларни жалб этиш, саноат, қишлоқ хўжалиги, сайёҳлик, тиббиёт ва фармацевтика соҳаларида ҳамкорликни ривожлантириш масалалари муҳокама қилинди.

Вилоят ҳокими минтақанинг ижтимоий-иқтисодий тараққиёт кўрсаткичлари ва сармоя салоҳияти ҳақида тўхталиб, сармоядорлар учун қулай шарт-шароитлар яратилганини таъкидлади. Шунингдек, у ҳиндистон компанияларини қўшма лойиҳаларни амалга оширишга таклиф қилди.

– Вилоят сармоядорлар учун улкан имкониятларга эга ҳудуд. Биз саноат, қишлоқ хўжалиги ва сайёҳлик йўналишларида ўзаро манфаатли ҳамкорликни йўлга қўйишга тайёрмиз. Туркистон халқаро аэропорти юқори салоҳиятга эга бўлиб, хорижий сайёҳларни қабул қилиш учун барча шароитлар мавжуд. Хожа Аҳмад Яссавий мақбараси ва ҳудуднинг бой тарихий-маданий мероси Ҳиндистондан келадиган сайёҳлар учун ҳам катта қизиқиш уйғотади, – деди Нуралхан Кўшеров.

Ҳиндистон Республикаси элчиси Сайлас Тангал икки мамлакат ўртасидаги ҳамкорлик салоҳияти юқори эканлигини таъкидлади. У ҳар йили тахминан 50 миллион нафар Ҳиндистон фуқароси хорижга сайёҳлик сафарларини амалга ошириши, шу боис Туркистоннинг сайёҳлик салоҳияти ҳинд сайёҳлари учун жозибадор йўналишлардан бирига айланиши мумкинлигини таъкидлади.

Шунингдек, элчи уран саноати, қишлоқ хўжалиги, сайёҳлик, пахта кластери, тиббиёт ва фармацевтика, муқобил энергия манбалари соҳаларида ҳамкорлик қилишга қизиқиш билдирди. У вилоятда халқаро даражадаги шифохона барпо этиш, қишлоқ хўжалиги ва озиқ-овқат саноатида аниқ лойиҳаларни амалга ошириш ташаббусини илгари сурди.

Учрашув якунида томонлар мазкур соҳалардаги алоқаларни янада мустаҳкамлаш, сармоявий ва ишбилармонлар ҳамкорлигини кенгайтириш борасида ишларни давом эттиришга келишиб олдилар.