Шимкент шаҳридаги “Дўстлик уйи”да “Бош Қомус: халқ танлови, юрт келажаги” мавзуида “Жамоат тотувлиги” ДКК қошидаги Журналистлар ва блогерлар клубининг навбатдаги мажлиси ўтди.

Ундан мақсад – янги Конституциянинг жамиятдаги аҳамиятини кенгроқ тушунтириш, конституциявий ислоҳотларнинг ижросини таҳлил қилиш ҳамда ҳуқуқий маданиятни шакллантиришда ахборот тарқатишнинг асосий йўналишларини белгилаб олиш эди.

Мажлисни Журналистлар ва блогерлар клуби раиси Абдез Иманқулов олиб борди. Унда клуб аъзолари билан бирга ҚР Давлат хизмати ишлари агентлигининг Шимкент шаҳри бўйича департаменти бош мутахассиси Махаббат Мамауджанова иштирок этди.

А. Иманқулов оммавий ахборот воситалари ва блогерлар ҳамжамиятининг жамият ва ҳокимият орасидаги ишончли ахборий алоқани кучайтиришдаги аҳамиятига тўхталиб, Янги Конституциянинг мазмуни ва конституциявий ислоҳотларнинг моҳиятини аҳолига сифатли ва ҳаққоний етказиб беришнинг дастакларини тилга олди.

Учрашувда Конституциянинг асосий тамойиллари, фуқароларнинг ҳуқуқ ва эркинликларини муҳофаза қилиш дастаклари, давлат бошқаруви тизимидаги янгиликлар, шунингдек, ҳуқуқий саводхонликни орттириш, жамоат фикрини шакллантиришда ОАВ ходимларининг масъулияти муҳокама қилинди.

Тадбир якунида конституциявий ислоҳотларни батафсил тушунтиришга йўналтирилган ахборот-тушунтириш ишларини тизимли равишда давом эттиришнинг аҳамияти қайд этилди.