Ўрдабаси туманидаги “Бөген” сув омборида Сув хўжалиги ходимлари куни муносабати билан тантанали тадбир ўтди. 

Тадбирда вилоят ҳокими Нуралхан Кўшеров йиғилганларни касб байрами билан табриклаб, сув хўжалиги ходимларининг мамлакат тараққиёти ва аҳоли фаровонлигини таъминлашдаги хизматларини алоҳида эътироф этди.

Қайд этилганидек, бугунги кунда вилоятда 575 минг гектар суғориладиган ер мавжуд. Вилоят сув хўжалиги тизими 42та сув омбори, 4 мингдан зиёд канал, 1794та қудуқ ҳамда 1256та дренаж иншоотини ўз ичига олади.

Жорий йилда сув омборларидаги сув ҳажми ўтган йилга нисбатан 2,4 миллиард куб метрга кўпайиб, уларнинг тўлдирилиш даражаси 50 фоизга етди. Соҳа инфратузилмасини янгилаш мақсадида 166 миллиард тенгелик лойиҳалар Ислом тараққиёт банкига тақдим этилган, уларнинг биринчи босқичи доирасида тўққизта йирик лойиҳа бўйича қурилиш ишлари бошланган.

Шунингдек, ўтган йили 114 минг гектар майдонда сув тежовчи технологиялар жорий этилган бўлса, жорий йилда бу кўрсаткични 164 минг гектарга етказиш режалаштирилган.

Байрам муносабати билан сув хўжалиги соҳаси ривожига муносиб ҳисса қўшган бир гуруҳ мутахассислар ҚР Сув захиралари ва ирригация вазирлиги, вилоят ҳокимининг мукофотлари билан тақдирландилар.

Тантанали тадбир таниқли санъаткорлар иштирокидаги концерт дастури билан якунланиб, меҳнат аҳлига юксак эҳтиром кўрсатилди.