Туркистоннинг келажаги – унинг бой тарихини асраб-авайлаган ҳолда замон талабларига мос равишда ривожланишига боғлиқ. Шу боис, нафақат янги бинолар ва йўллар қурилишига, балки шаҳар аҳолиси ҳамда меҳмонлари учун қулай, жозибадор ва мазмунли жамоатчилик нуқталарини яратишга ҳам алоҳида эътибор қаратилмоқда.

Ҳозирги кунда ана шундай муҳим ташаббуслардан бири сифатида “KÖNE ARBAT” сайёҳлик лойиҳаси ишлаб чиқилмоқда.

Лойиҳа доирасида бугун унинг ҳудуди кенгайтирилиб, тўлиқ замонавий қиёфага келтирилади. Бу ерда кўргазма ва экспозиция заллари, қаҳвахоналар, маданий тадбирлар ўтказиладиган очиқ майдонлар, устахоналар, дам олиш ҳудудлари ҳамда турли хизмат кўрсатиш иншоотлари барпо этилади. Шунингдек, тадбиркорликни ривожлантириш учун тижорат майдонлари, автотураргоҳлар ва пиёдалар учун қулай инфратузилма ҳам назарда тутилган.

Асосий мақсад – одамлар вақт ўтказишни истайдиган, қайта-қайта  ташриф буюришга арзийдиган ўзига хос жамоат жойини яратишдир. “KÖNE ARBAT” тарихий Туркистон руҳини мужассам этган ҳолда, замонавий шаҳар маданиятининг  янги  марказига айланиши лозим.

Шу билан бирга, темирйўл вокзали атрофини ҳам замонавий меъморий қиёфада ривожлантиришни режалаштирмоқдамиз. Зеро, Туркистонга ташриф буюрган ҳар бир меҳмоннинг  шаҳар ҳақидаги илк таассуроти айнан шу ҳудуддан бошланади. Шу боис, мазкур ҳудуднинг  меъморий қиёфаси ҳам, қулайлиги ҳам тарихий шаҳар мақомига муносиб бўлиши керак.

Хуллас, Туркистонда амалга оширилаётган ҳар бир янги лойиҳа – шаҳарнинг  эртанги кунига киритилаётган сармоядир. Мақсад – Туркистонни нафақат бугунги кун, балки келажак авлод учун ҳам  қулай, кўркам ва рақобатбардош шаҳарга айлантириш.