Вилоят ҳокими Нуралхан Кўшеров Қазиғурт туманига амалга оширган хизмат сафари доирасида «Ушбастау» ишлаб чиқариш ширкатида ғалла ўрим-йиғими жараёни билан танишди. Бу ерда буғдой тўлиқ пишиб етилган, жорий йилда мамлакатда биринчи бўлиб янги ҳосил хирмонларга уйилмоқда.

Вилоят ҳокими ўрим-йиғим ишларининг ташкил этилиши, хўжаликда жорий этилган замонавий агротехнологиялар ҳамда ишлаб чиқариш салоҳияти билан танишди. Шунингдек, Қазиғуртда етиштирилган маҳсулотлар кўргазмаси билан танишиб, маҳаллий тадбиркорлар ва деҳқонлар билан мулоқотда бўлди.

Нуралхан Кўшеров Президент Қасим-Жўмарт Тўқаев қишлоқ хўжалигини ранг-баранглаштириш ва маҳсулотни чуқур қайта ишлашни устувор вазифа этиб белгилаганини таъкидлади.

– Давлат томонидан кўрсатилаётган қўллаб-қувватлаш чораларидан самарали фойдаланиш, янги технологияларни атрофлича жорий этиш зарур. Бунинг учун изланиш, меҳнат ва янгича ёндашув талаб этилади. Бу борада қишлоқ хўжалиги мутахассислари зиммасида юксак масъулият мавжуд. Барчангизга меҳнатингизда улкан муваффақиятлар тилайман, – деди вилоят ҳокими.

«Ушбастау» ИЧШ 2002 йилдан буён деҳқончилик билан шуғулланмоқда. Жорий йилда хўжаликда 700 гектар майдонга буғдой, 110 гектарга арпа, 150 гектарга махсари ва 60 гектарга беда экилган.

Сўнгги йилларда хўжаликда намликни сақловчи технология изчил қўлланилмоқда. Бу йил мазкур усул 600 гектар ғалла майдонида жорий этилди. Технология тупроқ унумдорлигини сақлаш, намликдан оқилона фойдаланиш ва ҳосилдорликни ошириш имконини беради.

Хўжалик 2500 тонна сиғимга эга ғалла омбори, замонавий қишлоқ хўжалиги техникалари ва ғалла ўриш комбайнлари билан таъминланган. Бу ерда 12 одам доимий, 20 нафари мавсумий иш билан таъминланган.

Хизмат сафари давомида вилоят ҳокимига Қазиғурт туманининг қишлоқ хўжалиги соҳасидаги асосий кўрсаткичлари, сармоявий лойиҳалари ва истиқболдаги режалари ҳам тақдим этилди.

Қайд этилганидек, Туркистон вилоятида ўрим-йиғим мавсуми қизғин паллага кирган. Сўнгги саккиз йилда ҳудудда қишлоқ хўжалиги ялпи маҳсулоти ҳажми 551,1 миллиард тенгедан 1,2 триллион тенгега етказилиб, 2,2 бараварга ошди. Аграр соҳага қарийб 1 триллион тенге сармоя жалб этилди. Жорий йилда экин майдонлари 919,4 минг гектарга етказилди. Қишлоқ хўжалиги маҳсулотлари етиштириш ҳажми бўйича Туркистон вилояти мамлакатда етакчи ўринларни эгаллаб келмоқда.