Сариоғоч туманининг ҳокими Арман Абдуллаев навбатдаги шахсий қабулида аввалроқ рўйхатдан ўтган туманнинг 29 нафар фуқаросини шахсий масалалари юзасидан қабул қилди.

Унда туман ҳокимининг ўринбосарлари ҳамда туманнинг мутасадди бўлим раҳбарлари иштирок этиб, фуқаролар томонидан кўтарилган масалаларни ҳал этиш йўлларини атрофлича муҳокама қилишди. Қабул давомида аҳоли ижтимоий ёрдам, уй-жой навбати ҳамда бошқа  масалалар юзасидан саволлар беришди.

Туман ҳокими фуқароларнинг мурожаат ва таклифларини диққат билан тинглаб, уларнинг ҳар бири қонун доирасида кўриб чиқилишини таъкидлади.

– Ҳар бир фуқаронинг мурожаати эътиборсиз қолмайди. Кўтарилган масалалар қонун талабларига мувофиқ ҳар томонлама ўрганилиб, имкон қадар ижобий ҳал этилиши учун тегишли чоралар кўрилади. Фуқароларнинг ҳуқуқлари ва қонуний манфаатларини ҳимоя қилиш – фаолиятимизнинг асосий тамойилидир, – деди Арман Абдуллаев.

Қабул давомида айрим фуқароларнинг саволларига қонун доирасида жавоб берилди. Қўшимча ўрганишни талаб этадиган масалалар масъул бўлим раҳбарлари зиммасига юклатилди. Шунингдек, туман ҳокими ҳар бир мурожаатнинг ижроси доимий назоратда бўлишини маълум қилди.