Қасим-Жўмарт Тўқаев Қирғизистон Президенти Садир Жапаровнинг таклифига биноан Чўлпон-Отада Марказий Осиё ва Озарбайжон давлатлари раҳбарларининг норасмий машваратида иштирок этди. 

Аэропортда Қозоғистон Президентини Қирғизистон Вазирлар Маҳкамаси раиси – Президент маъмурияти раҳбари Ақилбек Жапаров кутиб олди. 

Норасмий учрашувдаги нутқида давлатимиз раҳбари Қирғизистон Президенти Садир Жапаровга анъанавий илиқ қабул ва норасмий учрашувни ташкил қилиш ташаббуси учун миннатдорчилик билдирди.

– Қозоқлар ва қирғизлар – биродар халқлар. Бизни келиб чиқишимиз ва тақдиримиз умумийлиги боғлаб туради. Ўртамиздаги дўстлик, ишонч, қариндошлик ва ўзаро қўллаб-қувватлаш – бу бизга аждодларимиздан мерос муқаддас бойлик ва абадий қадриятлардир. Бугун Қирғизистон таассуротли ўсиш суръатларини намойиш этмоқда. Биз сизнинг ютуқларингиздан хурсандмиз. Қирғиз давлатининг фаровонлиги – бутун Марказий Осиёнинг барқарорлиги ва барқарор тараққиёти гаровидир. Шубҳасиз, бу ютуқлар ҳурматли Президент Садир Жапаровнинг доно раҳбарлиги ва тинимсиз саъй-ҳаракатлари туфайлидир, – деди Қозоғистон Президенти.

Қасим-Жўмарт Тўқаевнинг сўзларига кўра, бу учрашув – кун тартибидаги долзарб масалаларни муҳокама қилиш ва ҳар томонлама шерикликнинг навбатдаги устувор йўналишларини белгилаш учун яхши имконият.

– Барча даражалардаги алоқаларнинг фаоллиги давлатларимизнинг биродар халқлар фаровонлиги ва бутун минтақа тараққиёти учун ижодий ҳамкорликка интилишини яққол тасдиқлайди. Бу борадаги улкан ютуқ XXI асрда Марказий Осиёни ривожлантириш мақсадида “Дўстлик, яхши қўшничилик ва ҳамкорлик тўғрисидаги Шартнома”ни имзолаш жараёнининг якунлангани бўлди. Бу тарихий ҳужжат стратегик шерикчилигимизда янги босқични англатади, биродар халқларимизнинг умумий келажаги учун ўзаро ишонч, ҳурмат ва масъулиятга асосланган минтақавий ҳамкорликнинг сиёсий қиёфасини шакллантиради, – дея таъкидлади Қозоғистон Президенти.

Давлат раҳбари Туркманистон Президенти Сердар Бердимуҳамедовга Шартномага қўшилгани учун ташаккур билдирди.

– Келажакдаги навбатдаги қадам ушбу ҳужжатдаги қоидаларни амалий ҳаётга татбиқ этиш бўлиши мумкин, деб ҳисоблайман. Шу муносабат билан дўстлик ва яхши қўшничиликни янада мустаҳкамлаш, савдо-иқтисодий ҳамда маданий-гуманитар ҳамкорликни мустаҳкамлашга қаратилган узоқ муддатли ўзаро ҳамкорлигимизнинг аниқ мезонларига эга тадбирлар режасини ишлаб чиқиш ва кейинчалик қабул қилишни таклиф этаман. Ўзаро ишончни мустаҳкамлаш ва минтақавий ҳамкорликнинг изчил тараққиёти туфайли Марказий Осиё ҳозирда ўзининг замонавий тарихидаги энг муваффақиятли даврни бошдан кечираётганини ишонч билан айтиш мумкин, – дея қайд этди Қасим-Жўмарт Тўқаев.

Президент Озарбайжоннинг машваратга тўла ҳуқуқли иштирокчи сифатида қўшилиши ушбу шаклнинг ижобий тараққиётида янги босқични бошлаганини таъкидлади.

– Биргаликдаги саъй-ҳаракатлар туфайли сиёсий мулоқотни янада чуқурлаштириш, сармоя, энергетика, саноат соҳаларида ҳамкорликни кенгайтириш, ягона транспорт-логистика тизимини шакллантириш учун шароитлар яратилмоқда. Сўнгги йилларда минтақа ичидаги савдо барқарор ўсмоқда, ишбилармонлик алоқалари кенгаймоқда, қўшма корхоналар ташкил этилмоқда, сармоявий лойиҳалар амалга оширилмоқда, ўзаро алоқалар мустаҳкамланмоқда. Маданият, таълим ва ёшлар соҳасида тажриба алмашинувлари янги сифат мазмун билан тўлмоқда. Ушбу ижобий натижаларнинг барчаси биродар халқларимизни янада яқинлаштиришга ва минтақанинг халқаро нуфузини мустаҳкамлашга хизмат қилмоқда, – деди давлат раҳбари.

Қасим-Жўмарт Тўқаевнинг фикрича, Марказий Осиёнинг дунёвий жараёнлардаги аҳамияти ишончли тарзда юксалмоқда, минтақа овози жаҳон майдонида тобора баланд ва салмоқли янграмоқда.

– Бунинг ёрқин тасдиғи – Қирғизистоннинг БМТ Хавфсизлик Кенгашига ноодатий аъзо этиб сайланганидир. Фурсатдан фойдаланиб, Қирғизистон Президенти ҳурматли Садир Жапаровни ва бутун қирғиз халқини ушбу тарихий ютуқ билан табриклайман, – деб таъкидлади Қозоғистон Президенти.

Давлат раҳбари минтақа мамлакатлари ўртасидаги ҳамкорликнинг барча муҳим масалалари ўтган йилги Тошкент шаҳридаги учрашувда атрофлича муҳокама қилинганини эслатди.

– Ўшанда билдирилган ташаббуслар, жумладан, машварат учрашувларининг тизимли ривожланиши юзасидан таклифлар ҳамон ўз долзарблигини сақламоқда ва уларни амалга ошириш мақсадида яқин ҳамкорликни талаб этади. Қозоғистон эришилган келишувларга содиқ ҳолда мамлакатларимиз ўртасидаги дўстлик, яхши қўшничилик ва стратегик шерикликни мустаҳкамлашга қаратилган ижодий ташабусларни илгари суришга интилмоқда. Умумий саъй-ҳаракатлар билан биз умумий тараққиёт йўлида янада юксак ижобий натижаларга эришамиз. Сўзимнинг якунида туркман дўстларимизга навбатдаги мулоқотга доир бўлажак тадбирларни муваффақиятли ўтказишни тилайман, – дея нутқини якунлади Қасим-Жўмарт Тўқаев.

Йиғилишда, шунингдек, Қирғизистон Президенти Садир Жапаров, Озарбайжон Президенти Илҳом Алиев, Тожикистон Президенти Эмомали Раҳмон, Туркманистон Президенти Сердар Бердимуҳамедов ва Ўзбекистон Президенти Шавкат Мирзиёев ҳам нутқ сўзлашди.

Марказий Осиё ва Озарбайжон давлатлари раҳбарларининг норасмий Машварат учрашуви якунида “Чўлпон-Ота декларацияси” қабул қилинди.