Вилоятимиз 2026 йилнинг дастлабки ярмини юксак ижтимоий-иқтисодий кўрсаткичлар билан якунлади. Январь-июнь ойлари якунларига кўра, қисқа муддатли иқтисодий ўсиш суръати 126,3 фоизни ташкил этиб, вилоят республикада 1-ўринни эгаллади. Биринчи чорак якунларига кўра, ялпи ҳудудий маҳсулот ҳажми 1 триллион 129,9 миллиард тенгега етиб, ўсиш суръати 109,6 фоизни ташкил этди.

Ушбу натижалар вилоят ҳокими Нуралхан Кўшеров раислигида ўтказилган кенгайтирилган ҳайъат йиғилишида муҳокама қилинди. Йиғилишда вилоят ҳокими ўринбосарлари, туман ва шаҳар ҳокимлари, бошқарма раҳбарлари ҳамда масъул муассасалар раҳбарлари иштирок этди.

Вилоят ҳокими белгиланган кўрсаткичлар ижросини таъминлай олмаган раҳбарларни танқид қилиб, муаммони ҳал қилиш борасида топшириқлар берди.

– Қисқа муддатли иқтисодий ўсиш кўрсаткичи бўйича вилоятимиз республикада биринчи ўринда. Бу – барчамизнинг ҳамкорликдаги меҳнатимиз самараси. Бироқ айрим туман ва шаҳарлар зиммасига юклатилган топшириқларни тўлиқ уддалай олмади. Ҳозирча огоҳлантирамиз, аммо тўққиз ой якунларига қадар ушбу камчиликларни бартараф этиш зарур. Ҳар бир туман, шаҳар ва қишлоқ ҳокими ўз ҳудудидаги даромад манбалари, молиявий аҳвол, иқтисодий ҳамда сармоявий имкониятларни яхши билиши лозим. Шундагина асосий иқтисодий кўрсаткичлар ўсади.

Ҳокимликлар ва масъул бошқармалар аҳоли ўртасида тушунтириш ишларини кучайтириб, вилоятда ишга туширилаётган завод ва корхоналарга маҳаллий аҳолини жалб этишга алоҳида эътибор қаратсин. Бандлик, сайёҳлик ва таълим соҳаларидаги масалаларни ҳал этиб, фаолиятни жонлантириш лозим, – деди Нуралхан Кўшеров.

Молия ва давлат активлари бошқармаси раҳбари Гулфари Ажиметова ижтимоий-иқтисодий тараққиётнинг биринчи ярим йиллик якунлари бўйича маъруза қилди. Шунингдек, у туман ва шаҳар ҳокимликлари ҳамда вилоят бошқармалари фаолиятининг самарадорлиги бўйича ўтказилган рейтинг натижаларини ҳам айтиб ўтди.

Жорий йилда баҳолаш учун 111та индикатор тасдиқланган бўлиб, уларнинг 93таси бўйича биринчи ярим йиллик натижалари чиқарилади.

Рейтинг якунларига кўра, туман ва шаҳар ҳокимликлари орасида Саврон, Тулкибош ва Қозиғурт туманлари дастлабки учликдан жой олди. Вилоят бошқармалари ўртасида эса Иқтисодиёт ва бюджетни режалаштириш бошқармаси, Маданият бошқармаси ҳамда Жисмоний тарбия ва спорт бошқармаси энг яхши кўрсаткичларни қайд этди.