Вилоят марказида вояга етмаганлар иши ва уларнинг ҳуқуқларини ҳимоя қилиш бўйича вилоят комиссиясининг мажлиси ўтди. Унда хавф остидаги болалар билан ишлаш, вояга етмаганларга қарши жиноий ишлар ҳолати ва улар ўртасида ҳуқуқбузарликнинг олдини олиш масалалари кўриб чиқилди.

Йиғилишга раислик қилган вилоят ҳокимининг ўринбосари Е. Даулбаев болалар ҳуқуқларини ҳимоя қилиш ҳуқуқни муҳофаза қилиш, таълим, соғлиқни сақлаш ва ижтимоий муҳофаза идораларининг умумий вазифаси эканлигини таъкидлади.

– Давлат раҳбари болалар хавфсизлигини таъминлаш, ҳуқуқларини муҳофаза қилиш ва ҳар томонлама ривожланиши учун қулай шарт-шароитлар яратиш масаласини давлат сиёсатининг устувор йўналишларидан бири сифатида белгилайди. Ўсмирлар ўртасидаги ҳуқуқбузарлик, болаларга нисбатан зўравонлик, безорилик, интернетдаги хавф-хатарлар ва уларнинг руҳий саломатлигига таъсир қилувчи бошқа омиллар ҳануз долзарблигича қолмоқда. Шу боис ҳуқуқбузарликларнинг олдини олишга қаратилган самарали чора-тадбирларни кучайтиришга катта эътибор қаратилиши керак, – деди ҳоким ўринбосари.

Мажлисда вилоят болалар ҳуқуқларини ҳимоя қилиш бошқармаси раҳбари Б. Нарбекова хавф остидаги болалар гуруҳлари билан олиб борилаётган ишлар ҳақида ахборот берди.

Полиция департаменти бошлиғининг ўринбосари Б. Жанаев вояга етмаганларга қарши жиноий ишлар ҳолати тўғрисида маъруза қилди, ҳуқуқбузарликларнинг сабаблари ва оқибатлари тўғрисида гапирди.

Вилоят таълим бошқармаси раҳбари Ғ. Ўринов таълим муассасаларида ҳуқуқбузарликларнинг олдини олиш, ўқувчилар хавфсизлигини таъминлаш, ҳуқуқий саводхонликни ошириш борасида олиб борилаётган ишлар, шунингдек, ота-оналар ва ҳуқуқни муҳофаза қилиш идоралари билан ҳамкорлик натижаларига тўхталди.

Мажлис якунида Е. Даулбаев масъул идораларга қатор кўрсатмалар берди.