Минтақамизда соғлиқни сақлаш соҳасини ривожлантириш борасида ишлар изчил давом эттирилмоқда. Айни пайтда ҳудудда 25 та тиббиёт муассасасининг қурилиши олиб борилмоқда. Бу ҳақда Туркистон вилоят соғлиқни сақлаш бошқармасининг 2026 йил дастлабки ярим йиллиги якунларига бағишланган ҳайъат йиғилишида маълум қилинди.

Йиғилишда вилоят ҳокимининг биринчи ўринбосари Зулпихар Жўлдасов ҳамда вилоят соғлиқни сақлаш бошқармаси раҳбари Асхан Байдувалиев иштирок этиб, минтақанинг соғлиқни сақлаш тизимида амалга оширилган ишлар таҳлил қилинди.

Тадбирда она ва бола саломатлигини муҳофаза қилиш, онкология ва кардиология хизматлари, иммунопрофилактика, тиббиёт муассасалари самарадорлиги, инфратузилмани ривожлантириш ҳамда бошқа долзарб масалалар муҳокама қилинди.

Туркистон вилояти ташкил этилганидан буён чақалоқлар ўлими 22,36 фоизга, болалар ўлими эса 6,49 фоизга камайди.

Шу билан бирга, вилоятдаги 19 та дастлабки тиббий-санитария ёрдами муассасаларида зарур марказлар ташкил этилди ҳамда 7 450 нафар бола маслаҳат кўмаги билан қамраб олинди. Шунингдек, Вилоят болалар шифохонаси ва Туркистон шаҳар болалар шифохонасига «Нуфузли болалар шифохонаси» мақоми берилди.

Ҳудуддаги тиббиёт муассасаларини замонавий ускуналар билан таъминлаш даражаси 84,85 фоизга етди. Айни вақтда давлат тиббиёт муассасаларида 19 та компьютер томографияси ускунаси, таҳлил тоифасидаги 8 та ультратовуш текширув ускунаси ва 7та магнитли-резонансли томография ускунаси фаолият кўрсатмоқда.

Айни пайтда ҳудудда 25 та тиббиёт муассасаси барпо этилмоқда. Уларга 8та шифокорлик амбулаторияси, 2та фельдшер-акушерлик пункти, 11та тиббий пункт ва 5 та жойлашиш иншооти киради. Ушбу лойиҳалар аҳолига кўрсатиладиган тиббий хизмат сифати ва ундан фойдаланиш имкониятларини янада оширишга хизмат қилади.

Ҳайъат йиғилиши якунларига кўра, тиббиёт муассасалари раҳбарларига аҳолини эмлаш даражасини камида 95 фоизга етказиш, она ва бола ўлимини камайтириш, онкология касалликларини эрта аниқлаш, кардиология хизмати моддий-техника базасини мустаҳкамлаш, тиббиёт муассасалари ҳолатини яхшилаш ҳамда аҳолини мажбурий ижтимоий тиббий суғурта тизими билан таъминлашни 90 фоизга етказиш борасида аниқ топшириқлар берилди.