Туркистон вилоятида Давлат раҳбари Қасим-Жўмарт Тўқаев ташаббуси билан амалга оширилаётган “Тоза Қозоғистон” умуммиллий лойиҳаси доирасида атроф-муҳитни муҳофаза қилиш, аҳоли манзиллари озодалигини таъминлаш, ободонлаштириш ҳамда кўкаламзорлаштириш йўналишида тизимли ишлар олиб борилмоқда.

Йил бошидан буён минтақада 15дан зиёд йирик экологик акция ташкиллаштирилди. Ҳар бир аҳоли манзилида 7 257 тадбирдан иборат режа тасдиқланиб, бугунги кунда унинг 4 515таси амалга оширилди.

Вилоятда нафақат атроф-муҳит тозалигини таъминлаш, балки жамиятда экологик маданиятни шакллантириш, табиатга нисбатан масъулиятни юксалтириш ҳамда она заминнинг гуллаб-яшнаши йўналишида доимий шанбаликлар, санитария тадбирлари, ободонлаштириш ва кўкаламзорлаштириш ишлари уюштирилмоқда. Йил бошидан буён дастур доирасидаги тадбирларда 500 мингдан зиёд одам иштирок этиб, 16 минг тоннадан зиёд чиқинди чиқарилди.

Экологик билим ва маданиятни шакллантириш “Тоза Қозоғистон” концепциясига мувофиқ, аҳолининг экологик саводхонлигини ошириш йўналишида ҳам тизимли ишлар олиб борилмоқда. Йил бошидан буён 18 256га яқин экологик тарбиявий соат, 560 сурат танлови, 4 669 давра суҳбати ҳамда 68 акция уюштирилди. Шунингдек, вилоят таълим муассасаларида “Яшил мактаб” лойиҳаси амалга оширилиб, унинг доирасида “Хомашё тўплаш йўлбошчиси”, “Экологик ташаббуслар йўлбошчиси”, “Улкан салоҳият” номинациялари бўйича ғолиблар аниқланди.

“Тоза Қозоғистон” – тозалик ва тартибни кундалик ҳаёт тарзига айлантиришга йўналтирилган ташаббус. Минтақада ушбу йўналишдаги ишлар давом этиб, аҳоли манзилларининг тозалиги ва гуллаб-яшнашига устуворлик берилади.