Туркистон вилоятининг Ўрдабоши туманидаги Оқбулоқ аҳоли пунктида қурилиш саноатини ривожлантиришга қаратилган алюминий композит панеллар ишлаб чиқарувчи завод очилди. Замонавий технологиялар асосида фаолият юритадиган мазкур корхона маҳаллий қурилиш материаллари ишлаб чиқаришни ривожлантириш ва ички бозор талабини қондириш имконини беради.

Корхонанинг очилиш маросимида Туркистон вилояти ҳокими Нуралхан Кўшеров иштирок этиб, янги ишлаб чиқариш корхонасининг иш бошлагани билан барчани табриклади.

– Барчангизни яқинлашиб келаётган миллий байрамимиз – Республика куни билан чин қалбимдан муборакбод этаман! Республика куни – давлатчилигимизни намоён этиб, мустақиллигимизни янада мустаҳкамлайдиган алоҳида аҳамиятга эга байрам. Ана шу улуғ байрам арафасида алюминий композит панеллар ишлаб чиқарувчи замонавий заводнинг очилишига гувоҳ бўлиб турибмиз. Бу – Туркистон вилоятининг саноат салоҳиятини ошириб, ҳудуд иқтисодиётига янги суръат бағишлайдиган муҳим лойиҳа.

Давлат раҳбари Қасим-Жўмарт Тўқаев ҳудудларга инвестиция жалб этиш, янги иш ўринларини яратиш ва маҳаллий ишлаб чиқаришни ривожлантиришга алоҳида эътибор қаратмоқда. Бугун ишга туширилаётган янги корхона ушбу топшириқларни амалга оширишнинг аниқ натижасидир.

Янги ишлаб чиқариш корхонасида қурилиш соҳаси учун зарур бўлган алюминий композит панеллар маҳаллий шароитда ишлаб чиқарилади. Корхонанинг йиллик ишлаб чиқариш қуввати 3 миллион квадрат метрни ташкил этади. Бу мамлакатимиз қурилиш саноатини сифатли маҳаллий маҳсулотлар билан таъминлаш, импортга қарамликни камайтириш ва ички бозор талабини қондиришга қаратилган муҳим ташаббусдир. Келгусида корхона маҳсулотларини Марказий Осиё мамлакатлари ва Россия бозорларига экспорт қилиш режалаштирилган.

Фурсатдан фойдаланиб, ушбу муҳим лойиҳани амалга оширишга ҳисса қўшган «Nur Group» компанияси раҳбарияти ва жамоасига, шунингдек, барча ташаббускорларга миннатдорлик билдираман. Бугун иш бошлаган заводнинг фаолияти муваффақиятли бўлиб, ишлаб чиқариш барқарор ривожланиши, маҳсулот ҳажми ортиши ва мамлакатимизда маҳаллий ишлаб чиқаришни тараққий эттиришга муносиб ҳисса қўшишига ишонаман, – деди вилоят ҳокими.

Тантанали маросимда қишлоқ оқсоқоллари лентани қирқиб, янги корхона фаолиятига оқ фотиҳа бердилар.

Шундан сўнг вилоят ҳокими заводнинг ишлаб чиқариш объектларини кўздан кечириб, технологик ускуналарнинг ишлаш жараёни билан танишди. Корхона фаолияти ва ишлаб чиқариш жараёни ҳақида «Nur Group» масъулияти чекланган жамияти директори Абдулла Муҳитдин маълумот берди.

Лойиҳанинг инвестиция қиймати 2,9 миллиард тенгени ташкил этади. Корхона йилига 3 миллион квадрат метр алюминий композит панеллар ишлаб чиқариш қувватига эга. Заводда 50 киши доимий иш билан таъминланади.

Лойиҳани амалга ошириш учун Ўрдабоши туманидаги Оқбулоқ аҳоли пунктидан «Туркистон» ижтимоий-тадбиркорлик корпорацияси» акциядорлик жамияти орқали 3,9 гектар ер майдони ажратилган. Айни пайтда қурилиш-монтаж ишлари тўлиқ якунланиб, асосий технологик ускуналар ўрнатилган.

Алюминий композит панеллар қурилиш объектлари фасадларини қоплаш ва биноларнинг ташқи кўринишини безашда кенг қўлланилади. Шу боис янги корхонанинг ишга туширилиши қурилиш материаллари ишлаб чиқариш тармоғини ривожлантиришга туртки бериб, маҳаллий маҳсулотлар улушини ошириш имконини яратади. Шунингдек, ҳудудга инвестициялар жалб этиш ва аҳолини барқарор иш ўринлари билан таъминлашга хизмат қилади.