Республика куни арафасида Сариоғоч туманида бир нечта янги объект тантанали равишда фойдаланишга топширилмоқда. Шундай иншоотлардан бири – Ақжар аҳоли пунктида барпо этилган шифокорлик амбулаториясининг очилиш маросими бўлиб ўтди.

Тантанали тадбирда иштирок этган вилоят ҳокими Нуралхан Кўшеров аҳолини янги объектнинг очилиши билан табриклаб, ўзининг самимий тилакларини билдирди.

– Барчангизни яқинлашиб келаётган миллий байрамимиз – Республика куни билан чин қалбимдан муборакбод этаман! Бу сана мамлакатимиз суверенитети, бирлиги ва тараққиёти учун мустаҳкам пойдевор яратган тарихий воқеадир. Улуғ байрам арафасида туманда янги шифокорлик амбулаториясининг очилишига гувоҳ бўлиб турибмиз.

Давлат раҳбари Қасим-Жўмарт Тўқаевнинг янги тиббиёт муассасаларини қуриш ва мавжудларини модернизация қилиш бўйича топшириқларига мувофиқ, вилоят аҳолисига сифатли ва қулай тиббий ёрдам кўрсатишга алоҳида эътибор қаратмоқдамиз. Бу йил ҳудудимизда 25 та тиббиёт объекти қурилмоқда. Уларнинг 4 таси Сариоғоч туманида жойлашган. Жумладан, Ақжар, Бўстандиқ ва Дихан-Баба қишлоқларида шифокорлик амбулаториялари, Дархон қишлоғида эса фельдшерлик-акушерлик пункти барпо этилмоқда.

Бу ишларнинг асосий мақсади – ҳар бир аҳолига сифатли тиббий хизматдан фойдаланиш имкониятини яратишдир. Бугун Сариоғоч туманида фойдаланишга топширилаётган шифокорлик амбулаторияси ана шу тизимли ишларнинг амалий самарасидир.

Фақат соғлом миллатгина қудратли давлат барпо эта олади. Шу боис соғлиқни сақлаш соҳасига йўналтирилган ҳар бир инвестиция халқ саломатлиги ва мамлакатнинг ёрқин келажагига қўшилган ҳиссадир. Шу муносабат билан янги тиббиёт муассасаси жамоасига шарафли меҳнат фаолиятида муваффақиятлар, туман аҳолисига эса мустаҳкам соғлиқ, тинчлик-омонлик ва фаровонлик тилайман! – деди вилоят раҳбари.

Қиймати 216 миллион тенгени ташкил этувчи лойиҳа «Mynbai» масъулияти чекланган жамияти томонидан амалга оширилди. Қурилиш ишлари 2026 йил май ойида бошланган.

Амбулаториянинг умумий майдони 460 квадрат метрни ташкил этади. Ушбу тиббиёт муассасасида 13 та янги иш ўрни яратилган бўлиб, бир вақтнинг ўзида 25 нафар аҳолига сифатли тиббий хизмат кўрсатиш имконияти мавжуд. Замонавий тиббий ускуналар билан жиҳозланган амбулатория Ақжар қишлоқ округидаги 8 мингдан зиёд аҳолига тиббий ёрдам кўрсатади.

Замонавий талабларга мувофиқ жиҳозланган бинонинг очилиш маросимида лента қирқилди. Шундан сўнг вилоят ҳокими маҳаллий зиёлилар вакиллари билан биргаликда тиббиёт муассасасини кўздан кечирди.

Тадбир давомида қувончли воқеага шерик бўлиш учун келган қишлоқ аҳолиси вилоят раҳбарига ўз миннатдорлигини билдирди. Эндиликда дардига шифо излаган қишлоқ аҳли ушбу тиббиёт масканига мурожаат қилиб, шифокорлар тавсияси асосида даволаниш ва зарур тиббий муолажаларни олиш имкониятига эга бўлади.