Вилоятга хизмат сафари давомида Сув захиралари ва ирригация вазири Нуржан Нуржигитов минтақада суғориш тармоқларини таъмирлаш ва замонавийлаштириш тадбирлари билан танишди.

Лойиҳалар сув исроф бўлишини камайтириш, ундан самарали фойдаланиш ва обикор ерларнинг сув билан таъминлашини яхшилашга қаратилган.

Ўтрор туманида Д. Алтинбеков номидаги магистрал каналнинг 10,7 чақиримлик қисми бетонланиб, чорва молларини суғориш иншоотлари барпо этилмоқда. Лойиҳа орқали 4400 гектар ернинг сув таъминотини яхшилаш кўзланмоқда.

Шунингдек, вазир «Қызыл ту» насос станцияси фаолияти билан ҳам танишди. Ҳозирда станцияда бешта насос қурилмаси ишлаб турибди. Сув етказиб бериш ҳажмини ошириш учун тўртта дизелли ва тўртта электр агрегатидан иборат саккизта кўчма насос қурилмаси захирага тайёрланган.

Чордара туманида «Қизилқум» ирригация-дренаж тизимини такомиллаштириш лойиҳаси 82,4 фоизга бажарилган. Унинг доирасида 311,2 чақирим канал ва 1426та гидротехник иншоот қайта таъмирланиб, 425,8 чақирим коллекторни тозалаш режаланмоқда. Лойиҳа 12,5 минг гектар ернинг сув таъминотини яхшилайди.

Жетисай туманида 210та вертикал дренаж қудуғини тиклаш ишлари олиб борилмоқда. Ушбу лойиҳа 37 минг гектар обикор ернинг ҳолатини яхшилаш ва тупроқ шўрланишини камайтиришга қаратилган.

– Сув хўжалиги инфратузилмасини янгилаш сув захираларидан самарали фойдаланишнинг муҳим шартидир. Шу билан бирга, сув тежовчи технологияларни кенг жорий этиш ва намликни кўп талаб қиладиган экинлар ҳажмини қисқартириш зарур, – деди вазир Н. Нуржигитов.