Ақўрдада Президент Қасим-Жўмарт Тўқаев Жаҳон Божхона Ташкилотининг бош котиби Иэн Сондерс билан учрашди.

Давлат раҳбари Қозоғистонда маъмурий ва иқтисодий тўсиқларни босқичма-босқич камайтириш, шунингдек, савдо-сотиқни яхшилашдаги Жаҳон Божхона Ташкилоти билан ҳамкорликнинг муҳим аҳамиятини таъкидлади.

Президент Қозоғистон Евроосиё марказида юклар транзити учун қулай шароитлар яратаётгани, бу борада катта ва ноёб имкониятларга эга эканини таъкидлади. Шунингдек, мамлакатимиз божхона расмиятчиликларини замонавийлаштириш учун рақамли ечимларни қўллаган ҳолда изчил равишда «ақлли чегара» усулини амалга ошираётганини қайд этди.

Ўз навбатида Иэн Сондерс Қозоғистон Республикаси божхона тизимининг узвий тараққиётини юқори баҳолади ва божхона маъмуриятчилигини такомиллаштириш, замонавий рақамли тизимларни жорий этиш ҳамда ваколатли иқтисодий операторлар тизимини мустаҳкамлаш борасида сезиларли ютуқларга эришилганини эътироф этди. Суҳбатдошлар тарихи 30 йилдан зиёд давом этаётган ўзаро манфаатли ҳамкорликни янада мустаҳкамлаш зарурлиги ҳақида фикр билдирдилар.

Шу билан бирга, жаҳон савдосидаги янги чақириқлар ва тамойиллар юзасидан фикр алмашилди. Марказий Осиё минтақасининг савдо-иқтисодий алоқаларини кенгайтириш ва транспорт-логистика салоҳиятини мустаҳкамлаш истиқболларига алоҳида эътибор қаратилди.

Учрашув якунида Қасим-Жўмарт Тўқаев шериклик ва дўстликни мустаҳкамлашга қўшган ҳиссаси учун Жаҳон Божхона Ташкилотининг бош котиби Иэн Сондерсни II даражали «Дўстлик» ордени билан тақдирлади, дея хабар берди Президент матбуот хизмати.