Мамлакатимизда жорий йилги вегетация даври барқарор кечмоқда “Қазсушар” РДК билан шартнома имзолаган барча деҳқон хўжаликлари сув билан ўз вақтида таъминланган. Вилоятнинг Жетисай ва Мақтаарал туманларида деҳқонлар пахта теримига киришишди. Хўжаликлар сувни тасдиқланган жадвал асосида, белгиланган ҳажмда ва ўз вақтида етказиб бергани учун “Қазсушар” РДКнинг маҳаллий бўлимига миннатдорчилик билдирмоқда. 

– Жорий йил 10 гектар майдонга пахта экдик. Ўтган йилга нисбатан сув масаласи анча яхшиланди. Оби ҳаёт жадвал асосида, етарли миқдорда келмоқда, муаммо йўқ. Илгари узоқроқ жойлашган экинзорларни сув билан таъминлашда қийинчиликлар юзага келарди. Ҳозир бу масала ҳам ҳал этилди. “Қазсушар”га катта раҳмат, – деди “Арынбек ата” деҳқон хўжалиги раиси Нурмахамбет Аринбек. 

Деҳқон Исмоил Атиллов эса 4,5 гектар майдонда пахта етиштирмоқда. 

– Экин майдонини икки марта суғордик. Сувни жадвалга мувофиқ олдик. Каналлар бетон билан қоплангани туфайли сув исрофи камайди. Сув олисдаги далаларга ҳам ўз вақтида етиб бормоқда, – дейди у. 

“Қазсушар” РДКнинг Туркистон филиали деҳқон хўжаликлари билан 277,5 минг гектар қишлоқ хўжалиги майдонларини экин суви билан таъминлаш бўйича 12 409та шартнома имзолаган. 

Вилоятда 2026 йилги вегетация даври учун сув олиш лимити 3,3 миллиард куб метр этиб белгиланган. Бугунги кунга қадар 3,2 миллиард куб метр сув олиниб, 270,8 минг гектар экин майдони суғорилди.

Жетисай тумани бўйича сув лимити 663 миллион куб метрни ташкил этади. Ҳозирга қадар унинг 585 миллион куб метридан фойдаланилди. Жорий йилги вегетация даврида туман деҳқонлари 53,6 минг гектар майдонга пахта экди.