Сайрам туманининг Қорабулоқ қишлоғида аҳоли, айниқса, ёш авлод учун қулай шарт-шароит яратиш, бўш вақтларини мазмунли ташкил этиш борасида хайрли ишлар амалга оширилмоқда. 

Яқинда қишлоқ ҳокимлигининг маблағи ҳисобидан «Авлиёкўл» маҳалласида замонавий болалар ўйингоҳи ҳамда спорт майдони барпо этилиб, фойдаланишга топширилди. Янги маскан болажонларнинг бўш вақтини мазмунли ўтказиши, спорт билан шуғулланиши ва соғлом турмуш тарзига риоя қилиши учун хизмат қилади.

Шу муносабат билан ўтган тадбирда маҳалла қўмиталари раислари, Оналар кенгаши аъзолари, нуронийлар ҳамда  жажжи болажонлар иштирок этдилар.

Тадбирда сўз олган Сайрам тумани ҳокими Мадияр Ўразалиев, Сайрам туманининг фахрий фуқароси Ҳамроқул Давронбеков ҳамда Қорабулоқ қишлоғи ҳокими Мақсат Қурманалиев болажонларни қутлаб, уларга мустаҳкам соғлик ва улкан муваффақиятлар тиладилар.

– Болаларнинг қувончи – юртимизнинг эртанги кунига бўлган ишончимиздир. Шу боис, улар учун замонавий ва хавфсиз ўйин майдончалари, спорт иншоотларини барпо этишга алоҳида эътибор қаратилмоқда, – деди М.Ўразалиев.

Тантанада болажонларга музқаймоқ ва турли совғалар улашилди.

Таъкидлаш жоизки, қишлоқда ижтимоий инфратузилмани яхшилаш ишлари босқичма-босқич амалга оширилмоқда. Келгусида бошқа кўчаларда ҳам болалар ўйингоҳлари ва спорт майдончаларини барпо этиш режаланган.