Туркистон вилояти ҳокими Нуралхан Кўшеров Жетисой тумани аҳолиси билан учрашди. Унда туманнинг ижтимоий-иқтисодий ривожланиш кўрсаткичлари, инфратузилма лойиҳаларининг амалга оширилиши, аҳолини қийнаб келаётган муаммолар ҳамда истиқболдаги вазифалар муҳокама қилинди.

Учрашув давомида вилоят ҳокими давлат раҳбари Қасим-Жўмарт Тўқаевнинг 28 октябрдаги «Янги тарихий даврдаги Қозоғистоннинг долзарб вазифалари» номли Қозоғистон халқига Мактубига тўхталиб, унда белгиланган устувор йўналишларни ҳудудда сифатли амалга ошириш муҳимлигини таъкидлади.

– Давлат раҳбари Мактубида иқтисодиётни ривожлантириш, аҳоли фаровонлигини ошириш ва ислоҳотларни аниқ натижалар билан давом эттириш вазифаларини белгилаб берди. Бугунги учрашув ушбу йўналишда амалга оширилаётган ишларни таҳлил қилиш, олдимизда турган вазифаларни белгилаш ҳамда сизларни ўйлантираётган масалаларни очиқ муҳокама қилиш имконини беради. Асосий мақсадимиз – инвестиция жалб этиш, янги иш ўринларини яратиш, ижтимоий инфратузилмани яхшилаш ва аҳолининг турмуш сифатини ошириш, – деди Нуралхан Кўшеров.

2026 йилнинг 9 ойи якунларига кўра, Жетисой туманининг ялпи ҳудудий маҳсулоти ҳажми 192,7 миллиард тенгени ташкил этиб, ўтган йилнинг шу даврига нисбатан 111,7 фоизга ўсган. Саноат маҳсулотлари ишлаб чиқариш ҳажми 9,2 миллиард тенгега етган. Шундан 4,8 миллиард тенгеси қайта ишлаш саноати ҳиссасига тўғри келади. Асосий капиталга йўналтирилган инвестициялар ҳажми 37,7 миллиард тенгени ташкил этган. Қурилиш ишлари ҳажми 19,3 миллиард тенгега етган бўлса, фойдаланишга топширилган турар жойлар майдони 20,8 минг квадрат метрни ташкил этган. Қишлоқ хўжалиги маҳсулотлари ҳажми эса 91,7 миллиард тенгега етган.

Туман 2025 йил якунлари бўйича ижтимоий-иқтисодий ривожланиш кўрсаткичлари асосида вилоятда иккинчи ўринни эгаллаган. 2026 йилнинг биринчи ярим йиллиги натижаларига кўра эса тўртинчи ўриндан жой олган.

Таълим соҳасида ўтган йили «Келажак мактаблари» лойиҳаси доирасида Ақниет аҳоли пунктида 600 ўринли, жорий йилда эса Жетисой шаҳрида 1500 ўринли мактаб фойдаланишга топширилган. Шунингдек, Жили сув аҳоли пунктида 150 ўринли маданият уйи ва кутубхона очилган.

Муҳандислик инфратузилмасини ривожлантириш натижасида жорий йилда учта аҳоли пункти табиий газ тармоғига уланган. Бугунги кунда тумандаги 105 та аҳоли пунктининг 93 таси, яъни аҳолининг 98,4 фоизи табиий газ билан таъминланган.

Ичимлик суви таъминотини яхшилаш борасида ўтган йили тўртта аҳоли пунктида 73 километр сув қувури янгиланган. Жорий йилда эса бешта аҳоли пунктида 30 километр ичимлик суви қувурини, учта сув минораси ва битта сув захираси иншоотини жорий таъмирлаш ишлари олиб борилмоқда.

Уй-жой таъминоти йўналишида ўтган йили 84 хонадонли ижара уйи фойдаланишга топширилган. 2026 йил охирига қадар уй-жой навбатида турган фуқароларга яна 64 та хонадонни топшириш режалаштирилган.

Соғлиқни сақлаш соҳасида ўтган йили еттита тиббиёт муассасаси фойдаланишга топширилган. Жорий йилда Ақниет ва Абай аҳоли пунктларида яна иккита фельдшерлик-акушерлик пункти қурилиши якунланади. Бундан ташқари, Асиқата қўрғони туман шифохонасида капитал таъмирлаш ишлари олиб борилмоқда. Муассасани йил якунига қадар фойдаланишга топшириш кўзда тутилган.

Вилоят ҳокими туманнинг ривожланиш суръатларини сақлаб қолиш ва иқтисодий кўрсаткичларни янада яхшилаш зарурлигини таъкидлади. Туман раҳбариятига инвестиция лойиҳаларини амалга ошириш, янги иш ўринларини яратиш ва аҳоли фаровонлигини ошириш борасидаги ишларни кучайтириш бўйича топшириқлар берди. Шунингдек, «Тоза Қозоғистон» дастури доирасида ҳудудларда тозалик ва ободонлаштириш ишларини мунтазам равишда олиб бориш зарурлигини эслатди.

Учрашувда 2025 йили аҳоли билан ўтказилган мулоқотда кўтарилган масалаларнинг ижроси ҳам кўриб чиқилди. Ўтган йили фуқаролар томонидан еттита масала кўтарилган бўлиб, уларнинг бештаси ижобий ҳал этилган. Қолган иккита масала бўйича ишлар давом эттирилмоқда.

Шундан сўнг туман ҳокими Серик Мамитов амалга оширилган ишлар ва келгусидаги режалар юзасидан ҳисобот берди.

Учрашув якунида аҳоли вакиллари ўзларини қийнаб келаётган масалаларни кўтариб, таклиф ва мулоҳазаларини билдирди. Мурожаатларга тегишли жавоблар қайтарилиб, кўтарилган муаммолар назоратга олинди.