Кундалик иш жадвалига мувофиқ вилоят ҳокими Ўмирзақ Шўкеев шаҳарнинг қурилиш майдонларини оралаб, янги иншоотлар фаолияти билан танишди. ҚР Тўнғич Президенти Нурсултан Назарбаевнинг ташаббуси ва Давлат раҳбари Қасим-Жўмарт Тўқаевнинг топшириғига биноан ташкил этилган Туркистон шаҳридаги Халқаро туризм ва меҳмондўстлик университети АҚШ, Франция, Италия, Португалия, Словакия, Гонконг, Ҳиндистон мамлакатларидаги етакчи юқори таълим муассасалари билан ҳамкорлик шартномасига эга.
Бунинг барчаси университет талабаларига юксак даражадаги назарий билимларни олиш ва хорижий амалиётдан ўтишга, шунингдек, БМТнинг Жаҳон туризм ташкилоти (UNWTO) қўлловидан баҳраманд бўлиш имконини беради. Университетга энг яхши маҳаллий ва хорижий профессорлар таклиф этилган. Олий таълим даргоҳида 50 нафар ўқитувчи талабаларга дарс беради.
Ўқув юртида инглиз, француз, хитой, араб, турк ва итальян тиллари курслари фаолият юритади. Ўтган йили очилган таълим даргоҳига мамлакатимизнинг турли минтақаларидан 600га яқин талаба ўқишга қабул қилинди. 2021 йили 815 йигит-қиз талаба бўлди. Жорий йил университетнинг 37 энг яхши талабаси Анталияда (Туркия) ёзги амалиётдан ўтган.
Туркистон шаҳридаги Халқаро туризм ва меҳмондўстлик университетида таълим етти йўналиш бўйича олиб борилади. Улар – туризм ва меҳмондўстлик саноати, халқаро ва ички туризмни ташкил қилиш, сайёҳлик хизматлари ва якка тартибдаги саёҳатларни ташкил этиш, меҳмонхона ва тўйхона бизнеси, сайёҳлик жойларни бошқариш, жисмоний тарбия ва спорт, жисмоний маданият ва дастлабки ҳарбий тайёргарликлардан иборат.
Таъкидлаш жоизки, университетда спорт биноси, футбол, кураш, бокс ва соғломлаштириш заллари ишлаб турибди.