Қарноқ қишлоғида Райимжон Қўчқоров раҳбарлик қилаётган “Үлес” хайрия жамоат жамғармаси саъй-ҳаракатлари билан иккита уй фойдаланишга берилди. Кўзи ногирон турғун Қудратулла Эрмат ўғли умр йўлдоши Муқаддас ва уч фарзанди билан янги беш хонали уйга кўчиб ўтишди. 

Фаоллар Тойир Абдувалиев, Бекзод Ҳабибов, Лазиз Тошбой ўғли, Ҳусан Маккамбоев янги уйга ўз совғаларини туҳфа этишди. Тасмани тантанали қирққан фахрий оқсоқол Тўлқин Саидмуродов уйни қуришда ёрдам берган барча тадбиркорларга, хусусан, толмас ташкилотчи Р. Қўчқоровга кўпчилик номидан мустаҳкам саломатлик, янги зафарлар тилади. Кам таъминланган турғунларни янги уй саодатига сазовор этишда алоҳида танилган тадбиркор Муҳаммадрайим Рўзбой ўғлига Р. Қўчқоров “Көне Түркістан перзенті” медалини тантанали тақдим этди.  

Шу куни Қарноқдаги яна бир хонадон – умр йўлдоши оламдан ўтган, фарзанди Сиддиқ Саттор ўғли билан истиқомат қилаётган Анора Отажонова янги уй саодатига мушарраф бўлди. “Үлес” қурган янги уйга яқинда келин тушиши режаланмоқда. Таъкидлаш жоиз, савоби мўл хайрия ишига фаол обуначиларимиз Уйғун Иброҳим ўғли ҳамда Қудрат Тиловберган ўғли муносиб ҳиссаларини қўшганлигини ифтихор ила таъкидлаймиз. “Үлес” бунёд этган уйлар сони 48га етди.